Omama bemaphandleni eZansi yemaNdebeleni bakhala ngengxaki ezitshiyeneyo lapho benanza ilanga labomama bemaphandleni,olweInternational Rural Womens Day izolo.
Inengi lithi lilahlekelwe yinzuzo kulandela ukuqhamuka kwegciwane leCoronavirus okwadala ukuvalwa kwelizwe ngeLockdown.
Omama esixoxe labo bathi kulutshwane abakuthakazelelayo ngalelilanga labo ngoba bebhekane lendubo ezinengi emakhaya.
Bathi ukuqhamuka kwegciwane leCoronavirus okudale ukuvalwa kwelizwe okweLockdown kubabisele emuva kunhlelo zabo.
UNkosikazi Saziso Khumalo oweVokola eInsiza South uthi kunengi okubaphazamisileyo selokhu kuqhamuke leligciwane.
Uphinde wathi bayaludinga uncedo lokuvuselela inhlelo zabo ukuze baziphilise.
Amazwi la agcizelelwe nguNkosikazi Janet Nkala oweMasholomoshe eGwanda North othi inengi labomama lidinga ukuncediswa.
UNkosikazi Nonhlanhla Mlotshwa odabuka eMashumba kuWard 4 eMatobo South uthi zinengi indubo ababhekane lazo esigabeni njengabomama.
UNkosikazi Matilda Dube oweInsiza uthi njengabomama bazimisele ukusebenza kodwa badinga usekelo.
UNkosazana Senzeni Maphosa uthi ezempilakahle emaphandleni kazimanga kuhle okufaka impilo yabomama engozini.
UMqondisi wenhlanganiso yabomama eye Women Development Association of Zimbabwe WODAZ , uNkosikazi Julieth Nkiwani uthi kubalulekile ukuphakamisa omama bemaphandleni ngoba besenza umsebenzi omkhulu yokulimela isizwe ukuze kubelokudla.
Lonyaka ilanga lokunanza imisebenzi yabomama bemaphandleni iqhutshwe phansi kwesihloko esithi “Rural women cultivating good food for all”.
Your browser doesn’t support HTML5
Udaba Silethulelwa nguAlbert Ncube