Owayengumlingisi njalo engusomabhizimusi wakwele South Africa uShona Ferguson obhubhe ngeviki edluleyo ungcwatshiwe ngoLwesithathu lapho obekuthe gwaqa umndeni wakhe, kwathi abanye balandela obekusenzakala enkundleni zebulenjini.
Abakhulume embuthanweni lo babalisa amadodakazi akhe, umzukulu, lezinye izihlobo, njalo kulalelwe lamazwi kaNkosikazi wakhe uConnie Ferguson.
Abanye abalokhe bekhala ezimathonsi ngokubhubha kwakhe, ngabeZimbabwe abahlala eSouth Africa lakwamanye amazwe, abathi kunengi okwakuncomeka ngomuyi.
Inengi limazi ngokuphatheka kumidlalo yemfanekiso kamabonakude eka Generations, Muvhango, loRockville.
Ingcwethi kwezokulingisa njalo owake waphatheka kumdlalo kamabonakude owaziwa ngokuthi Makorokoza, uBhekilizwe Ndlovu uthi inengi labeZimbabwe belixhasa uFerguson ngoba ephethe kuhle umzimba wakhe ngokuwuqinisa, eleziqwanga, njalo ewuloba-lobe okutshiyeneyo okwama tattoos, okukhwabithwa linengi labesifazana kumbe abesilisa abaqhuba inhlelo ezifanayo.
Your browser doesn’t support HTML5
Ingxoxo loMnu. Bernard Bhekilizwe Ndlovu
UNdlovu uthi phezu kwalokho, uFerguson ubengomunye wabambalwa kwabensundu abaphumelelayo kweleSouth Africa, njalo ephethe kuhle unkosikazi wakhe.