Uzulu wakoBulawayo sechothoze kakhulu amapholisa ngokutshisa amaKombi amabili enzikini yalelidolobho izolo ngemva kokuwagijimisa ewethesa umlandu wokusebenza ngaphandle komthetho.
Ababone lokhu kusenzakala bathi amapholisa la ajikele i-teargas phakathi kwamaKombi la ehamba ngemota asebaleka lapho enanzelela ukuthi ebesedale ingozi.
Uhulumende uthi imitshova engabhalisanga ukuthi isebenza iphansi kwenkampani yakhe yeZupco kamelanga atshovise.
Isikhulumeli samapholisa koBulawayo uMnu Abednico Ncube utshele iStudio 7 izolo ntambama ukuthi ubengakezwa lutho ngalesisehlakalo, sona esisolwe kakhulu yinhlanganiso yeBulawayo Progressive Residents Association.
Ocubungula ezombusazwe uMnu Effie Dlela Ncube laye uthi okwenziwe ngamapholisa yikwephula amalungelo oluntu okungamelanga kuvunyelwe.
Your browser doesn’t support HTML5
Ingxoxo loMnu. Effie Dlela Ncube
Kunjalo nje, amabandla ezombusazwe aphikisayo lawo asole amapholisa esithi asebenzise amanyathelo alukhuni kakhulu.
Isikhulumeli sebandla le MDC-T, uMnu. Witness Dube, loba ebulenjini be Internet uthe uhlelo luka hulumende olokuzama ukulungisisa ezokuhambisa aluhambi ngemfanelo.
Umsekeli wesikhlumeli sebandla leMDC Alliance, uMnu. Felix Magalela Mafa Sibanda utshele iStudio Seven ukuthi amapholisa awenzi kuhle umsebenzi.
Your browser doesn’t support HTML5
Ingxoxo loMnu. Felix Magalela Mafa Sibanda