Izakhamizi endaweni ezitshiyeneyo kweleZansi yemaNdebeleni seziqalile ukugola amacimbi zikhalaza ngokuthi ngabe uhulumende ufaka imithetho yokugola lokuthengisa lawamacimbi ukuze zithole lazo ukuziphilisa.UAlbert Ncube usipha loludaba.
Inengi kulesisabelo lithi lanxa ligola lawamacimbi kalitholi inzunzo efaneleyo ngenxa yezizatho ezitshiyeneyo ezigoqela intengo ephansi.
Abanye ngabakhala ngabantu bokuza abasuka endaweni ezibalisa iMberengwa leMasvingo ababuya bezogola lawamacimbi behamba lawo kibo.
UMnu Luka Ncube uthi manengi kakhulu amacimbi esigabeni sabo sakoBeula eMatobo.
UMnu Gabriel Luphondo oyisakhamuzi seMawane eGwanda South uthi ukuswelakala kwezulu kumaviki adlulileyo aphazamise ukukhula kwalamacimbi.Uthi labo abasuka kwezinye izabelo bezogola amacimbi kulesisabelo kumele bahlawule.
Amazwi akhe asekelwe nguMnu Kudakwashe Zulu isakhamuzi seMatobo othi abantu ababuya ukuzogola amacimbi ngapha badala ukuthi intengo yamacimbi ibephansi.
Kungakho uZulu uthi kumele kube ålendlela ehlelekileyo yokuthengisa lawamacimbi ukuze uzulu kulesisabelo athole ukuziphilisa ngalawamacimbi.
Sixoxe njalo loMnu Graidom Phiri oweMatobo othi amacimbi asuke abamanengi kakahlu osekudale ukwehla kwentengo yawo.
Asenelisanga ukuxhumana lomphathintambo obona ngamabhizimusi asacathulayo uNkosikazi Sithembiso Nyoni.
Izisebenzi zikahulumende ezigoqela amapholisa lababalisi lazo zithethe lelithuba lekhefu lephasika ukuyagola amacimbi emaplazini angaphansi kwedolobho leGwanda laseCollen Bawn.