Sokuqhamuke ingxoxo-mpikiswano njalo ngodaba lweGukurahundi ebulenjini bokuzilibazisa obe twitter le Facebook kulandela ukubotshwa kwamalunga ebandla le Mthwakazi Republic Party ngeviki edluleyo, abanye besithi injongo yabo ilenkethabetshabi.
Amalunga la, ayisitshiyagalolunye abotshwe ngeviki edluleyo njalo akhangelelwe ukumiswa phambi komthethwandaba kamantshi koBulawayo namuhla, ukuzwa ukuthi engakhululwa ngemali yesibambiso eye bail.
Kukhangelelwe ukuthi bayabe sebehloliwe ngabezempilakahle, njengokunquma kukamantshi, ngendlela yokubona ukuthi balimala okunganani bebotshwa ngamapholisa.
Ababotshiweyo betheswa icala lokubangela udlakela bephandle komthethwandaba kamantshi koBulawayo besola ababesithi yikuhlukuluzwa komkhokheli wabo uMnu. Mqondisi Moyo ngamapholisa.
Ngemva kokubotshwa kwabo, inengi elalingabazi, ikakhulu elingaveli ezigabeni zeMatabeleland, lasola injongo yalo yokuthi kufanele isizwe sikaMthwakazi sehlukaniswe lelizwe leZimbabwe sizibuse.
Abanye bathi imbangela ludaba lweGukurahundi, okukhanya ingani abanye bayalusekela ngoba bengafuni kukhulunywe ngalo, lanxa bengekho kuhulumende webandla leZANU PF.
USithandekile Mhlanga weStudio 7 uxoxe lomunye obelandela lingxoxo mpikiswano uMnu. George Mkhwananzi ukuze sizwe imbono yakhe ngaloludaba.
Your browser doesn’t support HTML5
Ingxoxo loMnu. George Mkhwananzi