Umkhuhlane we Covid-19 ohlasele uzulu emhlabeni jikelele ukhanya usuvimbe inengi lezizalwane zeZimbabwe ezihlala kwamanye amazwe ukuthi ziyevaketshela izihlobo labangane ekhaya ngekhefu leKhisimusi.
Kulezo esezihlala kweleBhilithane inengi lazo lithi lonyaka kaliyi ekhaya. Intathelizindaba ye Studio 7, uEzra Tshisa Sibanda usethulela loludaba.
Ngalesikhathi sokusele iviki ukuthi ikhefu leKhisimusi lifike kuyabe sokuxokozela ezilindweni zendizamtshina abantu sebegada besiya ekhaya ukuyajabulela iKhisimusi khona, kodwa lonyaka kulomgoqo ovimbileyo wona uligcikwane lecoronavirus.
UMnu Kay Mabaso ohlala e-Leicester eBhilithani uthi impilo ibinzima lonyaka:
"Umnyaka ka2020 lowu ubenzima kakhulu kithi lapha, especially mina ngangivele ngiplane ukuthi ngizahamba ekhaya kodwa ukusa angisaphumelelanga ngendaba yeCovid. Angisakwazanga ukuthi ngihambe lami ngiyebona abazali , isifiso besikhona kakhulu ayii kodwa umnyaka lowu vele kufana lokuthi vele siwusus e nje eKhalendeni kuthiwe ubungekho ngoba usibuyesele emuva kakhulu mani usufake ezikweledeni ezinzima kakhulu lumnyaka."
UMnu Gman Sipepa Nkomo ohlala edolebheni leSwindon, khonale njalo eBhilithani, uhlezi ehamba ekhaya minyaka yonke kukhefu lekhisimusi kodwa lonyaka uthi kayindawo.
"Ngenxa yalesisifo esikhona umuntu uzoyidlalela khonalapha eEngland, kunzima akuhambeki Covid leyi iqeda abantu mani, syakhuleka impela ukuthi abantu baphephe elokhuzeni lapha kulowu umkhuhlanelo, ngoba yeyi Covid is for real. Umuntu uyayadlala khonalapha ehluleka nje ukuthi kube lamaVisitor kumbe kwathinithini, thina singabantu esizijwayelele ukuthi kunjenje sibesesilungiselela ukuyekhaya ngale kuyehlatshwa inkomo kudliwe abantu bajabule," kutsho uNkomo.
Nkosazana Velile Moyo ohlala edolobheni le Nottingham wabhujelwa nguyise ngoNtulikazi ekhaya, ubelesifiso sokuyakhulumisa unina ekhaya ngalinyanga kodwa ubanjwe umkhuhlane we Covid-19 eselungiselela ukugada kwathiwa ngeke aphume eNgilandi.
"Bekumele ngihambe mhlaka 10 December, ngiyedlalela ikhisimusi ekhaya loMama wami ngemva kokutshiywa ngumaBaba ngoJuly but angisahambanga ngoba ngathestwa positive for Corona last week , bekumele ngiyekhalela uMama. Ngizwa ubuhlungu kakhulu, bengifisa ukuthi ngiyembamba uMama wami izandla, ngisebuhlungwini kakhulu, kutsho uMoyo.
Inengi alisayi ekhaya kodwa lithumela imali kuzihlobo labangani ukuthi zisizakale zithenge ukudla ngekhisumusi. UMnu Givemore Karidza wedolobheni le Stoke-On-City ngomunye wabo.
"Bengifisa ukuthi ngan'thiwa ngiyafika ekhaya manje ngenxa yokuthi umsebenzi engiwusebenzayo bathi uhambe uyele manje akuyenzi umsebenzi uyatshe uphele njalo futhi leVaccine leyi ukuthi ihlatshw'abadala manje lakho ngani izimali zakhona ziyahlupha, so kungasenani ngithumezile imali yokuthi abadala labo bekwanise ukuthola imali, ngithi Happy Christmas , uNkulunkulu abenathi," kutsho uKaridza.
Unkosazana Plaxedis Tshuma we Cambridge ufisela abazali bakhe ikhisimusi emnandi ngoba lonyaka kayi kuyababona eZimbabwe.
Kutsho uTshuma: "Bengilesifiso sokuyadlala iChristimas ekhaya labazali bami eZimbabwe but sokwehlule ngendaba yeCovid leyi ekhona, plus labantwana ngeke ngikhone ukuTravella labantwana ngendaba yomkhuhlane lowu okhona. Abazali bami ngibafisela ukuthi bangene emnyakeni omutsha bengabaphilileyo ,iNkosi ibelabo kuze kubenaphakade ngingeke ngikhone kudlala lani , lidlale kuhle bazali bami."
Ukuphuma kweleBhilithane kumele umuntu aqale ayehlolwa ukuthi akalamkhuhlane we Covid-19 njalo isithupha sakhona uyasibhadalela sona esiyiso esibuzwa nxa ungena njalo kweleZimbabwe. Ngakho ke inengi likubone kuyindleko enkulu ikakhulu nxa ulemuli enkulu ohamba layo.
Kukhanya lonyaka kuzihlobo labangane ikhisimusi iyabe iziqandela nje, ngeke babonane, bebendawonye, badle, bagide kubemnandi ngendaba yalumkhuhlane we Covid-19.
Your browser doesn’t support HTML5
Udaba Silethulelwa nguEzra Tshisa Sibanda