Izakhamizi zemaphandleni zithi zilakho ukuhlaselwa yindlala ngomnyaka ozayo ngenxa yokuqonga kwentengo yenhlanyelo okuzadala ukuthi inengi labo lingalimi.
Inhlanyelo elesisindo samakhilogramu amahlanu 5kg ibiza amadola eMelika alitshumi lanhlanu US$15. Lanxa uhulumende elohlelo oluthiwa Pfumvudza/ Intwasa olokuncedisa izakhamizi ngenhlanyelo kayisibo bonke abayitholayo.
Inengi lezitolo ezithengisa inhlanyelo kaziyamkeli imali yakuleli osekutshiye inengi lezakhamizi lisehluleka ukuthi liyithenge ezitolo. Lapho etholakala ithengiswa ngemali yakuleli iyabe ibiza imali emangalisayo.
Izulu liqalile ukuna endaweni ezitshiyeneyo zelizwe kuliviki kodwa izakhamizi esixoxe lazo zithi azikaqali ukulima ngoba zingela nhlanyelo.
Uhulumende uphe ezinye izakhamizi inhlanyelo phansi kohlelo lokulima kungasetshenziswa amakhuba olweGatshompo kodwa layo kayiyeneli okungadala indlala kutsho uNkosikazi Siphathisiwe Mthombeni oweSilikwe eGwanda North.
"Inhlanyelo kaGatshompo siyitholile sibili sesilungisile ukulima, amagodi sesigebhile kodwa into esuka ibe lusizi yikuthi ilutshwane njengoba umuntu ebephiwa i5kg and asilandlela esingayengezelela ngayo njengoba inhlanyelo ibiza kangaka okutsho ukuthi kuzaphinda kube yindlala futhi ngoba abanye kabayitholanga yonale ekaGatshompo."
EMawane Gwanda bathi kabakayitholi inhlanyelo esuka kuhulumende kungakho kabakaqalisi ukulima lanxa izulu linile, kutsho uMnu Gabriel Luphondo.
"Sihleli so emakhaya akula untu osengene emasimini ngendlela yokuba inhlanyelo vele kasilayo, sitshayile uGatshompo bekuthiwa sizaphiwa kodwa kuthulisile asikwazi ukuthi kungabe kuhambani.Inhlanyelo iyabiza , kambe nxa izabiza i10 000 yena umbalisi engazake ayithenge yonaleyo eye 10 000 ngoba kuphezulu kwamandla ethu silibukele so izulu liyana abantu bayakhala baphongukhangelana akula locela inhlanyelo komunye," kutsho uLuphondo.
UMnu Lunguza Mlala odabuka eKezi uthi yena uhola imali Yakuleli kungakho kasoze yenelisa ukuthenga linhlanyelo ethengiswa ngemali yakwamanye amazwe.
"Imali okhuluma ngayo leyo asomali esiyitholayo thina nxa sikhuluma ngemali sikhuluma ngamabond imali vele engasebenziyo anegue ngiyithenge inhlanyelo singabalimi kuzasilimaza kakhulu ngengathi abalimi esiyabe sizama ukuthi silime emakhaya asisoze siphumelele," kutsho uMlala.
Obona ngezokulima eZansi yemaNdebeleni uMnu Innocent Nyathi ubike ukuthi sebethole amathani enhlanyelo angamatshumi ayisitshiyagalolunye kodwa udubo ababhekana lalo ngolokuswelakala kwezimota zokuthwala linhlanyelo isiya kubalimi.
Your browser doesn’t support HTML5
Udaba Silethulelwa nguAlbert Ncube