Izakhamizi zeMatobo sezidlela evalweni kulandela ukubhubha kosane esibhedlela seMaphisa olubikwa lubulewe ngumkhuhlane weCovid 19, lokhu kuza ngesikhathi inani lalabo abahlaselwe yileligciwane liqonga njalo nje.
Izakhamizi esixoxe lazo ziyethesa izizalwane zakuleli ezibuya okungekho emthethweni zivela phetsheya umlandu yokumemethekisa ingciwane leCorona Virus emaphandleni njalo zithi kuyadingeka ukuthi uhulumende abophe ziqine emngceleni yelizwe ukuze kwenqatshelwe ukumemetheka kwaleligciwane.
Inani lalabo asebebanjwe leliigciwane kulesisabelo seliqonge laya kwabalikhulu lamatshumi ayisithupha 160 labulala umntwana oyedwa eSilawa eMaphisa obelenyanga eziyisitshiyangalolunye ezelwe.
Inengi lalabo abahlaselwe yileligciwane yizizalwane zakuleli ezivelele kweleSouth Africa leBotswana.UMnu Graidom Phiri oyisakhamuzi seSun Yet San uthi bafakwa engozini yilabo abasuka phetsheya.
"Kulabantu ababuya from South Africa bezohlala ngapha without iquarantine, okwesibili asikaboni lapho abantu abatest khona ukuthi abantu baleCorona kumbe abala yoyo problema kulabantu kulezimota ezithwala abantu from Bulawayo ebusuku zibuya nga after all eBulawayo kulomkhuhlane onjalo thats our main concern you never know ukuthi abantu laba balomkhuhlane or not," kutsho uPhiri.
Amazwi akhe agcizelelwe nguMnu Lovemore Ncube odabuka koMalaba yena owethesa abomthetho umlandu yokumemethekisa leligciwane ngokufumbathisa labo abachapha imngcele okungekho emthethweni.
"Ukungavikeleki kwethu kubangelwa ngabantwana abacrosser iborder okungekho emthethweni becroser emaceleni iborder jumping, sikhala kakhulu ngamasotsha lamapholisa asemngcweleni ayiyo avulela umkhuhlane ukuthi ungene ngendlela abasebenzalana ngakhona labomalayitsha bebanika intshukutshu ukuthi bangene bakithi sisenkingeni," kutsho uNcube.
UMnu Promise Tshabangu ngusobhuku weSitezi, yena uthi sokudingeka ukuthi uhulumende abhode ngemizi ehlola uzulu wonke kulandela ukuqonga kwenani lalabo asebehlaselwe yileligciwane.
Kulokwesaba okukhulu ukubana phose umkhuhlane sukhona phakathi kwesigaba njalo kuyaswelakala ukubana uhulumende nga uyabuya angene phakathi kwemizi angene door to door wonke umuntu atest ngokubana angayethekisa yonale into kuzakuba nzima, kukhanya uhulumende uqakathekisa abantu kakhulu abasemadolobheni kukanti lathi ngaphandle kumele siqakathekiswe sihlolwe ukwenzela ukuthi umkhuhlane ungamemetheki.
Ngaphandle kwalokhu uTshabangu uthi okudala ukuthi abantu behambe okungapheliyo yindlala esemakhaya.
"Njalo eyinye imbangela abantu bayalamba uhulumende wasithembisa ukubana uzafeeder abantu ukudla asikuboni kufika nzima," kutsho uTshabangu.
Your browser doesn’t support HTML5
Udaba Silethulelwa ngu Albert Ncube