Umphathintambo obona ngobudlelwano beZimbabwe lamanye amazwe uMnu Sibusiso Moyo uthi kungamanga ukuthi isiphathamandla senkampani yeDrax International uMnu Delish Nguwaya, obotshwe ngeviki edluleyo, ulePassport ephiwa iziphathamandla zikahulumende kumbe abantu abaqakathekileyo abenza umsebenzi welizwe, iDiplomatic Passport.
Embikweni awethule izolo uMoyo uthe nxa kuliqiniso lokhu, uNguwaya wayithola ngokungekho emthethweni leyo Passport.
UNguwaya usejele ngemva kokubotshelwa ukuqambela uhulumende amanga ukuthi iDrax International yinkampani elungisa amaphilisi, okwabangela ukuthi iphiwe umsebenzi wokudingela ilizwe okokusebenzisa ukuvikela umkhuhlane weCoronavirus lamanye amaphilisi.
Inkampani le yayizabhadlalwa imali engange US$60 million.
UMnu Nguwaya ubikwa elobudlelwano lemuli kaMongameli Emmerson Mnangagwa lanxa nje imuli kaMnangagwa imphika.
Imifanekiso eyathathwa kumalanga atshiyeneyo edindwe yinkundla yeZimLive.com iveze uNguwana elamawele kaMongameli Mnangagwa, uCollins loShaun.
Inkampani yeDrax International yathenga ama-mask atshiphileyo yawathengisela uhulumende ngeUS$1 million. Le yinto ecunule abantu abanengi.
Ingcwethi ecubungula ezombusazwe uMnu Effie Dlela Ncube utshele iStudio 7 ukuthi udaba lobudlelwano beDrax International lemuli kaMnangagwa kumele luphenywe kabanzi.
Your browser doesn’t support HTML5
Ingxoxo loMnu Effie Dlela Ncube