Kulabantu abangamatshumi ayisithupha lambili, 62, ababanjwe igciwane leCoronavirus izolo.
Lokhu kubangele ukuthi inani lasebefunyelwe belegciwane leli eZimbabwe likhuphuke liye kumakhulu amane alamatshumi ayisithupha lantathu, 463.
Ugatsha olubona ngezempilakahle luthi phakathi kwabantu laba, abangamatshumi amabili lane bavele kweleSouth Africa, abahlanu bavele eMelika kuthi abane bavele kweleZambia.
Abavele eLesotho kulabane, eBotswana bathathu kuzokuba njalo lababili abavele kweleNamibia.
Abangamatshumi amabili ngabavele beseZimbabwe abathole umkhuhlane lo elizweni.
Idolobho lakoBulawayo yilo elikhokhelayo ngabantu abangu-32 abatholakale belomkhuhlane lo izolo lilandelwa ngeleHarare lona elile-15.
Isiphathamandla senhlanganiso yeBulawayo Vendors and Traders Association uMnu Michael Mdladla Ndiweni utshele iStudio 7 ukuthi ukukhuphuka kwenani labaleCoronavirus lokhu kuyethusa.
Your browser doesn’t support HTML5
Ingxoxo loMnu Michael Mdladla Ndiweni
Sixoxe njalo lesiphathamandla senhlanganiso eqhuba inhlelo zokulwisana leCoronavirus eyeI’m 4 Bulawayo Against Covid-19 uMnu Useni Sibanda yena othe okudanisayo yikuthi abantu abanengi abagqoki ama-mask.
Uthe abanye bagqoka kuphela nxa bengabona amapholisa ngoba besesaba ukubotshwa kulokuthi bagqokele ukuzivikela.
Your browser doesn’t support HTML5
Ingxoxo loMnu Useni Sibanda
Ukukhwela mahlayana kwabantu abalomkhuhlane lo lokhu kuza ngesikhathi izisebenzi zogatsha lwezempilakahle sezikhalale umsebenzi zikhala ngeholo eliphansi.
Odokotela, abongi lezinye izisebenzi zezibhedlela ezitshiyeneyo zazise izolo ukuthi sezikhalele umsebenzi ngoba imali eziyiholayo kayiseneli lutho lanxa uhulumende eyengeze nge50 percent ngoLwesithathu.
Isiphathamandla senhlanganiso elimukisa uzulu ngomkhuhlane weCoronavirus eyeCitizens Covid-19 Monitor uMnu Effie Dlela Ncube uthe kulungile ukuthi izisebenzi lezi zikhalale ngoba lazo zidinga imali engaziphilisa.
Your browser doesn’t support HTML5
Ingxoxo loMnu Effie Dlela Ncube