Izakhamizi zemaphandleni eMatabeleland South zithi ukuvalwa kwelizwe ngenjongo yokwenqabela ukumemetheka kweCoronavirus sokuzilethele indlala emangalisayo.
Zithi impuphu kayitholakali ezitolo zemakhaya kanti njalo lapho eyabe ithe yatholakala khona kanye lokunye ukudla okutshiyeneyo kubiza imali ephezulu kakhulu.
Izakhamizi ezinengi ezikhulume lomsakazo weStudio 7 zithe njalo izimota zokuthi zigade ziyedinga ukudla okulentengo enganeno emadolobheni kazikho.
Lanxa amanye amabhizimusi evuliwe emadolobheni kuliviki, amabhasi kanye lezimota ezithwala uzulu zilokhu zingavunyelwa.
Isakhamuzi seGwakwe enyakatho yeGwanda uMnu Naison Nkala uthi uhulumende kumele angenele ahlenge uzulu wemaphandleni endlaleni.
“Kulobunzima kudaba lwempuphu ngoba kunje asifiki eGwanda, siyesaba ngoba le-transport yakhona ukuthi uyithole konke lokudla kunzima,” kutsho uMaNkala.
Amazwi akhe agcizelelwe ngesinye njalo isakhamuzi seGwakwe uNkosikazi Sakhile Nyathi yena othe inengi lalabo abahlaselwe yindlala ngasebeluphele abangelamuntu obancedisayo.
“Lapha silezalukazi ezinye kazilamali kuthi abanye ngasebabhujela ngabantwana; so, bayadinga ukuthi bancediswe labo bathole ukudla,” kutsho uMaNyathi.
Inhlanganiso enakekela abalambayo ngesikhathi sendlala eyeWorld Food Programme ithi ukuqhamuka kwegciwane leCoronavirus kulakho ukudala ukuqonga kwenani labantu abahlaselwe yindlala emhlabeni wonke jikelele lonyaka ngokuphindwe kabili.
EZimbabwe kuphela bayizigidi eziphose zingene kweziyisitshiyangalombili abadinga usizo lokudla.
IWFP ithi idinga izigidi zamadola emelika eziphezu kwekhulu elilodwa, US$130 million ukuze iqhubeke isiza uzulu wakuleli ngokudla.
Your browser doesn’t support HTML5
Udaba Siluphiwa nguAlbert Ncube