Inhlanganiso elwela amalungelo oluntu, iZimbabwe Lawyers for Human Rights, ithi isimangalele uMongameli Emmerson Mnangagwa lohulumende wakhe emthethwandaba icela ukuthi babanjwe ngamandla ukuze baphathise abantu abaswelayo ngokudla lezinye indingeko zempilo ngalesisikhathi sokuvalwa kwelizwe ngenxa yesifo seCoronavirus.
Inhlanganiso le ikhweze loludaba enkantolo imele omamangala ababili ababalisa umeli weHarare North edale lephalamende, olilunga leMDC uMnu Rusty Markham kanye lomqondisi wenhlanganiso yeCenter for Public Policy uMnu Mfundo Mlilo.
Omamangala bafuna uhulumende adingele abaswelayo ukudla njalo abaphathise ngemali.
Umphathintambo wezemali uMnu Mthuli Ncube yena umemezele ngenyanga ephelileyo ukuthi uhulumende uzaphathisa izimuli eziyisigidi ngemali kuqala nje kulinyanga ngemali ngoba ekunanzelela ukuthi ukuvalwa kwelizwe sokulethele abantu abanengi ubunzima.
Asenelisanga ukuzwa kuhulumende ukuthi solwaqala na loluhlelo. Ukuhlaziya loludaba sixoxe lomeli weSoutherton edale lephalamende uMnu Peter Moyo.
Your browser doesn’t support HTML5
Ingxoxo loMnu. Peter Moyo