Ezinye izitolo koBulawayo zibikwa sezifuna incwadi etshengisa ukuthi uhlala ngaphi nxa abantu bethenga impuphu emizameni yokwenqabela ukuthenga okwedlulisileyo.
Lokhu kwenzakala ngesikhathi ukusilela kwempuphu kuqhubeka eZimbabwe njalo inengi litshona kundwendwe zokuyithenga lanxa nje abantu bemele bahlale ezindlini phansi kohlelo lokwenqabela ukumemetheka komkhuhlane weCoronavirus.
“Ukuthi umuntu asebenzise i-proof of residence yikutshengisela ukuthi umuntu uhlala lapha. Nxa ulama-lodger sivumelane ukuthi uyabuya lephepha lendlu, nxa ulama logder angu 4, liyabuya liyi 4 lisebenzise iphepha elilodwa,” kutsho unobhala wenhlanganiso yezakhamizi zeNkulumane uMnu Mandlenkosi Nyathi.
Lanxa abanye abatshona kundwendwe beyithola impuphu, abanengi bathi ayitholakali lula.
“KoBulawayo sithwele nzima nge-distribution yempumpu. Sithwele kanzima, ukudla asikutholi ngendlela,” kutsho isakhamuzi uNkosikazi Sitshengisiwe Ndlovu.
Amazwi akhe agcizelelwe ngesinye njalo isakhamuzi uMnu Elliot Nkomazana yena othi lapho etholakala khona, esikhathi isinengi impuphu ithengiswa ngemali ephezulu.
“Sicela ukuthi uhulumende alethe impuphu yama$70, ithengiswe ngezigaba ngezigaba. Sicela igovernment isebenze labokhansila ngoba yibo esabakhethayo,” kutsho uMnu Ndlovu.
Your browser doesn’t support HTML5
Udaba Siluphiwa nguBathabile Masuku