Idale lephalamende selivaliwe okwenyanga phose ezimbili ezilandelayo emizameni yokwenqabela umkhuhlane weCoronavirus.
Usomlomo waleli dale uMnu Jacob Mudenda wazise ngoLwesithathu ukuthi sebemise zonke inhlelo zephalamende ezigoqela ukuhlangana kwamalunga ayo ukuze kwehliswe ingozi yomkhuhlane lo.
UMudenda uthe idale leli lizavulwa mhlaka 5 ngoNkwenkwezi kusiya ngokuthi isimo siyabe sesinjani.
NgoLwesithathu emini umkhuhlane lo ubusubulele abantu abedlula inkulungwane eziyisitshiyagalombili emhlabeni jikelele.
Ukuvalwa kwephalamende yeZimbabwe lokhu kuza ngemva kokuba uMongameli Emmerson Mnangagwa azise izolo ukuthi imibuthano yabantu abedlula ikhulu ayisavunyelwa njengongo yokwenqabela iCoronavirus.
Kodwa uMnangagwa ubuthanise inkulungwane lenkulungwane zabantu eNyanga ngoLwesithathu emkhosini wokusungula uhlelo lokulima ngokuthelezela, okuyinto emenze wasolwa ngabanengi.
Khepha uMnangagwa uthe umlayo wakhe uzaqala ukusebenza ngoLwesihlanu mhlaka 20, ngakho uthe akulalutho olubi alwenzileyo.
Ingcwethi ecubungula ezombusazwe uMnu Zenzele Ndebele utshele iStudio 7 ukuthilanxa evumelana lenyathelo elithethwe yiphalamende, uyamsola kakhulu uMnangagwa ngokubuthanisa inkulungwane zabantu eNyanga.
“Esikubonayo lapha nguMongameli ofaka imithetho asuke engayilandeli... Singabona njalo uhulumende esebenzisa udaba lweCoronarivus lolu ukuthi abamabandla aphikisayo bengahlangani,” kutsho uMnu Ndebele.
Your browser doesn’t support HTML5
Ingxoxo loMnu Zenzele Ndebele