Uzulu wakoBulawayo uthi kasoze amukele ukuguqulwa kwesisekelo sombuso welizwe okuzanywa nguhulumende weZanu PF ngoba kujonge ukupha uMongameli welizwe amandla amanengi.
Lokhu kuphume emhlanganweni oqhutshelwe kuleli dolobho yinhlanganiso yeZimbabwe Coalition on Debt and Development (ZIMCODD) kuliviki ngenjongo yokulimukisa uzulu ngenguquko le eza phansi kweConstitutional Ammendment Bill No 2.
Uhulumende uzama ukuguqula imithetho engamatshumi amabili lasikhombisa phansi kweBill leli.
Abakhulume emhlanganeni lo bathe ukuguqulwa kwemithetho lokhu kuzathathela idale lephalamende amandla okucubungula udaba lokweboleka izikwelede kwamanye amazwe ukuze kubonakane ukuthi zilungele ilizwe na.
Ngokunjalo, abanengi bathi kabayamukeli linguquko. Omunye wabantu laba lilunga ledale lephalamende elimele iLuveve, uNkosikazi Stella Ndlovu yena okhuthaze uzulu ukuthi ayale ukuyamukela linguquko.
Uhulumende uzama njalo ukuguqula isisekelo sombuso ukuze uMongameli welizwe abe nguye yedwa olomlandu wokukhetha abahluleli bemithethwandaba lomtshutshisi omkhulu uProsecutor-General.
Ufuna njalo ukwengeza inani labaphathintanmbo bakahulumende abangayisiwo malunga edale lephalamende.
Kodwa osakhulayo wakoBulawayo uMichaele Ndiweni utshele iStudio 7 ukuthi kuyamangalisa ukuthi uhulumende useguqula isisekelo sombuso welizwe yena engakasigcwalisisi sonke ngemva kokulotshwa kwaso ngo2013.
Kusukela ekupheleni kwayonale inyanga kusiya kunyanga ezayo idale lephalamende likhangelelwe ukuphuma ijumo lithapha imibono kazulu mayelana ngokuguqulwa kwesisekelo sombuso lokhu
Your browser doesn’t support HTML5
Udaba Siluphiwa nguAnnahstacia Ndlovu