Izakhamizi zeGwanda South sezilethemba lokusungulwa komsakazo kazulu kulandela inyathelo likahulumende lokuvula amagagasi eManama omsakazo ozasakaza ngesisutho ngesikhathi umhlaba uphakathi kokunananza ukuqathaketha kwemisakazo kumbe iWorld Radio Day.
Umsakazo weManama uzabamba kumagagasi athi 103.8 kuFrequency Modulation FM nxa suthe waphiwa imvumo yokusakaza.
Ugatsha olubona ngezamagagasi lokusakaza luthi lumsakazo kazulu uzasakaza ngolimi olukhulunywa kuleyondawo olwesisuthu njalo izabamba okwamakhilomitha angamatshumi amane kusuka eManama.
Emhlanganweni oqhutshwe lugatsha lukahulumende olubona ngamagagasi lokukhitshwa kwembiko eManama kuviki eyedlulileyo UNkosikazi Nyathi oyisakhamuzi seFumukwe uthi sesiside isikhathi belinde umsakazo kazulu.
UMnu Simosenkosi Sibanda , ongumbalisi esikolo semfundo yaphansi eManama uthi ukusungulwa komsakazo kazulu uzathuthukisa ezemfundo esigabeni seManama.
UZulu emhlubulweni weZansi yemaNdebeleni seleminyaka elinde ukusungulwa kwalimsakazo.
UMnu Malach Nkomo owake waba ngumsakazi waphinda wana ngumeli wedale lephalamende uthi bekulokwesaba phambilini ukuthi limsakazo izaphatha ezombangazwe.
Omunye njalo umsakazi olodumo UMnu Omphile Marupi uthi inyathelo lokusungulwa komsakazo weSisotho lo akumelanga kube yize esithi kuzadala ukulondolozwa kwamasiko.
UKhansila weManama UMnu Ephraim Nyathi uthi njengezakhamizi bazasebenza ndawonye ukuze lumsakazo uphumelele.
UNkosikazi Vivienne Marara Zhangazha UMqondisi wenhlanganiso yemisakazo yezigaba eyeZimbabwe Association of Community Radio Stations uthi uhulumende kumele akhulume esenza.
NgolweSihlanu eleZimbabwe limanyane lamanye amazwe womhlaba ekunanzeni ilanga lokuqakathekisa umsebenzi wemisakazo ele World Radio Day.
Indikimba yokunanza ilanga leWorld Radio Day lonyaka ibigijima ngala amazwi athi Imisakazo, Inqubelaphambilo le Ntuthuko kumbe ''Radio, Diversity and Development” ngesingisi.
Your browser doesn’t support HTML5
Udaba Silethulelwa nguAlbert Ncube