Umsakazo weradio ubikwa lokhe uthenjwa ngabanengi ekutholeni masinya indaba eZimbabwe lanxa sokulendlela ezinengi zokukhuxhumana phakathi kukazulu, inengi lazo zingezebulenjini.
Inengi likhala ngokuthi uhulumende lokhe engafuni ukukhulula amagagase ukuze aphe amalicense imisakazo ezimeleyo ikakhulu eyezigaba amaCommunity Radio Stations.
Selokhe lathola uzibuse ilizwe leZimbabwe kalilayo imisakazo yezigaba amaCommunity Radio Stations eseyaphiwa imvumo loba amalicense wokusakaza ngenxa yemithetho ekhona, encindezela labo abafuna ukuqala imisakazo bezimele bodwa.
Umsakazi olodumo owasebenzala iZBC lomsakazo ozimeleyo I Radio VOP uMnu John Masuku uthi uhulumende usebenzisa imisakazo ukutshengisa amandla akhe.
“Uhulumende kazimiselanga ukuthi ezwe amazwi atshiyenayo. Ayisiyo injongo yemisakazo. Injongo yemisakazo ngeyokuthi abantu bakhulume lokho abakufunayo, iloba kubi loba kuhle,” kutsho uMasuku.
UMnu Foster Dongozi okhokhelela inhlanganiso yentathelizindaba eye ZImbabwe Union of Journalists (ZUJ) uthi uhulumemende kumele anakekele limisakazo ngoba ifinyelela abanengi kuleli.
“Imisakazo iqakatheke kakhhulu kuzwekazi le Africa. Yiyo esetshenziswa ngabantu abanengi kuzwekazi le Africa, ngoba ungayiphanyeka esihlahleni uqhuba umsebenzi wakho. Kohu isaqakathekile kakhulu. Ezigabeni lapho okulama minorty group kuyabambanisa abantu laba kuqinisa ulimi lempilo zabo ngendlela ezitshiyeneyo,” kutsho uDongozi.
Esinye isakhamuzi se Harare uMnu Farai Gwaze uthi uhulumende kumele enelise ukubambanisa ukusebenza kwemisakazo ye radio lendlela zokukhulumisana zakhulezi nsuku ukuze amazwi abantu abasezigabeni afinyelele kuhulumende.
“Ngendlela engibona ngayo, impumelelo yethu njengabantu abaseZimbabwe kumsakazo singaba lokubonisana ngento ethiwa yi convergence. Uhulumende wehluleka ukufaka imali ukuthi imisikazo yezigaba bethole indlela yokuthi bezwe amazwi avela kuhulumende lokuthi amazwi avela kibo ukuba azwakale kuhulumende,” kutsho uGwaze.
Okusekelwe ngesinye isakhamuzi uMnu Raymond Dube othe imisakazo enjenge Studio 7 isincede kakhulu ngesikhathi uhulumende evimba ukusebenza kwemisakazo ezimeleyo elizweni.
UDube uthi: “Imisakazo isaqakathekile eZimbabwe ngoba yiwo umsakazo osathengekayo. Ungabe ufuna ukubala amaphephandaba wodwa kawufundi kodwa imisakazo isuka incede ngoba abantu bayafunda ngolimi lwabo, imisakazo isaqakatheke kakhulu.”
Omele inhlanganiso ye Zimbabwe Association of Community Radios (ZACRAS) uNkosikazi Vivian Marare Zhangazha uthi bayathokoza ukuthi uhulumende uselungisela ukuvumela izigaba ukuba zibe lemisakazo esithi bakhala ngemali enengi efunakalayo.
“Thina njenge ZACRAS sithakazelela okwenziwa nguhulumende ukuba kube lemisakazo yezigaba. Singakhangele kusukela ngoNtulikazi sokube logatsha lwe BAZ. UMnu Mangwana wasitshela ukuba kuzakuba lemisakazo elitshumi ezaba lemisakazo”
Unobhala kugatsha olubona ngokukhitshwa kwemibiko uMnu Nick Mangwana uthi uhulumende uzimisele ukupha imvumo yokusakaza emuntwini wonke oseZimbabwe ngoba kulilungelo lakhe.
Kodwa umsekeli wesikhulumeli se MDC uMnu Luke Tamborinyoka uthi uhulumende we ZANU PF kasoze alethe inguquko elizweni.
Kutsho uTamborinyoka: “Sithakazelela ilanga leli phakathi kokudana okukhulu. Imisazakazo yethu ikhuluma ngeZanu PF. Akusoze kube lenguquko. Amalayisensi amanengi aphiwa abantu be ZANU PF, oSupa Mandiwanzira labo Munyaradzi Hwengere yibo abaphiwa amalayisense.”
Ngomyaka ka 2001 uhulumende wethula umthetho oweBroadcasting Services Act owakhokhelela ekubunjweni kohlangothi olweBroadcasting Authority of Zimbabwe (BAZ) eyiyo elawula ukusebenza kwemisakazo njalo okumele iphe imvumo yokusungulwa kwemisakazo ezimeleyo leyezigaba.
Inhlanganiso ezifana labo Media Institute of Southern Afroca labo Zimbabwe Association of Community Radio Stations (ZACRAS) sezile minyaka zizama ngazo zonke indlela ukuncenga uhulumende ukuba athukulule amagagasi zisebenzisa isisekelo sombuso welizwe kodwa lokhu kuyinsindabaphendule.
Lokhu yikho okwenza imisakazo efana labo Studio 7, Shortwave radio Africa, Radio VOP leminye basungule inhlelo zokusakaza bephandle kwelizwe ukuze uzulu athole imibiko enqotho ngokwenzakala elizweni angeke ayithola emisakazweni kahulumende. Okulapho uhulumende waqala ukubopha lokuhlukuluza intathelizindaba ezisebenzela limisakazo leminye engasiyo phansi kukahulumende.
Ngemva kukahulumende womanyano ngomnyaka ka 2012 uhulumende wenza angani usethukulula amagagase ngokunxusa ababefuna amalicense wokusakaza kodwa okwamangalisa abanengi yikuthi imisakazo efana labo Star FM le ZifM elabanini abalobudlelwano le ZANU PF yiyo eyathola.
Loba nje uhulumende esefaka imithetho emitsha yokuba kube lemisakazo yezigaba abanengi besabela ukuba uzakupha labo abamsekelayo imvumo etshiya abantu abenelisayo ukwenza lokhu bengalani lebandla eliphikisayo.
Your browser doesn’t support HTML5
Udaba Silethulelwa nguMlondolozi Ndlovu