Inhlanganiso emela izikhalazo zabeZimbabwe kweleSouth Africa eyeZimbabwe Community in South Africa, iqhube umhlangano wokukhanda amacebo okuqeda ubugangi obudalwa yizizalwane zeZimbabwe kweleSouth Africa.
Inkosi yakoMthwakazi uBulelani Lobhengula Khumalo, obesemhlanganweni lo ukhuze abantu ukuthi batshiyane lobugebenga.
“Kuqakathekile ukuthi singalibali ukuthi size la ukuzocasha nje ukuthi silungise ukuhlala Ekhaya,” kutsho uMnu Khumalo.
“Manje ukuthi sifike la sibe comfortable senze izinto ezingalunganga akunamakhelwana ozosivumela siqhubeke kanjalo. Kodwake akuvumelekanga ukuthi ba sivictimaize. Kumelenje kuhlalwe phansi kuzwiswiswane. Yikhonje besihlangene la.”
Isikhulumeli seZimbabwe Community in South Africa uMnu Bongani Mkhwanazi uthe babize lumhlangano ngemva kwezikhalazo ezinengi zobugebengu obenziwa yinzalo yeZimbabwe.
Uthe lokhu sokusenza ukuhamba umuntu echelesile ezikhulumela kumakhalekhukhwini wakhe kube yingozi enkulu ikakhulu enzikini yeJohannesburg lasemalokitshini ahlala abeZimbabwe abanengi agoqela eleHilbrow, eBerea leYeoville.
“Abanye babantu bayabuyela ekhaya bacocobise bazenze abamsulwa bethi bengabuya ngapha bezokwenza ukuganga,” kutsho uMkhwanazi.
“Sikhuthaza ukuthi umuntu kasebenze, asebenzele umdeni wakhe. Abantu mabengadali amathuba akhuthaza izigangi afana lokuthenga impahla ezitshontshiweyo. So sithi abantu lingakhohlwa ukuthi emuva latshiya kunjani.”
Isiphathamandla sehofisi yeZimbabwe Consular, eJohannesburg, uMelody Chaurura, laye obekhona kulumhlangano.
Yena ke uthe isehlakalo sokubulawa kwepholisa eDiepsloot ngabasolwa ababikwa bevela eZimbabwe, yinto ethelela abantu bonke ihlazo.
“Asisekeli imisebenzi yokuganga njalo sikhuthaza abeZimbabwe bonke ukuthi bahloniphe umthetho,” kutsho uChaurura.
Inengi ebelisemhlanganweni lo lisole amapholisa ngokudlelana lalezi zigebenga ngoba kazibotshwa, ezibotshwayo zikhululwa masinyane.
Kodwa isiphathamandla samapholisa laso abesikulumhlangano uLieutenant Colonel Ntsekiso Mofokeng uqonqosele abantu ukuthi bamangalele nsitha amapholisa adlelana lezigangi ukuze lawo abotshwe.
“Sicela kumphakathi wonke ukuthi amapholisa enza okungalungile abatshele u-station commander walapha abahlala khona to say umpoyisa we-station esi so, ogqoke so igama lakhe ngusibanibani olemoto enjena, ele-registration enje, ukuthi nali ipholisa elenze lokhu nalokhu. Zonke izimoto zesipoyisa sile automated vehicle location system,” kutsho uMnu Mofokeng.
Kuvunyelwene kulumhlangano ukuthi kuzabunjwa iqula lokulwisa ubugebenga lobu eligoqela amapholisa, abezomdabu, amabandla ezombusazwe izakhamizi labenhlanganiso ezimela izizalwane zeZimbabwe kweleSouth Africa.
Abangene lumhlangano bagoqela abantu makhaza, abezenkolo, abezomdabu lamabandla atshiyeneyo ezombusazwe eZimbabwe.
Your browser doesn’t support HTML5
Udaba Siluphiwa nguBenedict Nhlapho