UmkaMongameli welizwe uNkosikazi Auxillia Mnangagwa lamhlanje uvakatshele izalukazi lamaxhegu eMawabeni lapho akhuthaze uzulu ukuthi anakekele asebegugile.
UNkosikazi Mnangagwa uphatheke emsebenzini yangekhaya egoqela lokupheka ngemva kokuba ayabele asebegugile ukudla.
UNkosikazi Mnangagwa wethule linkuthazo ngemva kokuvakatshela ugogo uViolet Ncube oleminyaka yokuzalwa engamatshumi eyisificaminwemibili lambili ohlala yedwa emzini wakhe eMawabeni.
UNkosikazi Mnangagwa ufike lapho waphatheka emsebenzini yangekhaya ebalisa ukusinda indlu, ukufulela kanye lokupheka.
Uthi inengi lilahla abazali sebegugile libethesa umlandu wokuba ngabathakathi. Ekhuluma esikolo seMawabeni Primary lapho uzulu abethe gwaqa khona, uNkosikazi Mnangagwa ukhuthaze uzulu ukuthi anakekele ogogo labokhulu.
“Lokhu esiyabe sikubona lamhlanje esikwenzayo sikuhlakulela ukuthi sikwazi ukuthi sisuka kubomama sisuka kubogogo yibo esingabo lamhlanje, okuthabisayo yikuthi kunengi ezindlini zethu siyakubona esikwenzayo esakufundiswa yilababantu.Gogo ofisa sikwenzele khona ekhaya yikuphi, buya uzositshela ukuthi kuyini okuhluphayo,” kutsho uNcube.
Ugogo uViolet Ncube ubonge kakhulu inyathelo elithethwe nguNkosikazi Mnangagwa esithi ubhekane lendlala.
“Futhi ngithabe okudlulisayo ngizakudla njengoba onyama bafakwe endlini, imikungulu ngeyendlini iyabekwa, ngibonga okwedlula ukubonga aluba izibusiso zisuka ezandleni zami ngabe ngiyambusisa kodwa ngokuthi zisuka kuNkulunkulu angikwazi ukuthi uNkulunkulu yena ukumisa njani kodwa ngokucela kwami ngicela ambusisi,” kutsho uNcube.
Omunye walabo abakade bekulumbuthano nguNkosikazi Beatrice Ndlovu laye oyamukele inyathelo elithethwe nguNkosikazi Mnangagwa esithi babhekane lendlala njalo kulezinsuku baphila ngo kuphiwa.
“Sibusisekile kakhulu sengathi uNkulunkulu angayandisa izibusiso zokufika kwakhe endaweni yethu yonaleyi esikiyo , isimo sendlala sikhona kodwa sibonga izandla lezi eziphayo yizo ezisiphathisayo empilweni,” kutsho uNdlovu.
UNkosikazi Mnangagwa uphe abagugileyo laba ukudla okubalisa impuphu lerayisi kwathi omama abazithweleyo baphiwa impahla zabantwana.
Your browser doesn’t support HTML5
Udaba Silethulelwa nguAlbert Ncube