Ibandla leMDC lithi amapholisa avimbe umcimbi walo obuzaqhutshelwa eHarare ngoLwesithathu lapho umkhokheli walelibandla uMnu Nelson Chamisa abezakwethula khona umbiko wakhe omqoka ophathelane lobunzima obuselizweni.
Umbuthano lo ubuphansi kwesihloko esithi ‘Agenda 2020’ njalo uChamisa ubekhangelelwe ukuhlela indlela iMDC ethi kumele ilandelwe ukuze kulungisiswe umnotho welizwe lezombusazwe.
IMDC ithi amapholisa ayazise ukuthi aphatheke ngodaba lokuvulwa kwezikolo, ngakho akasoze enelise ukulondoloza ukuthula emcimbini lo.
Lesi yisinqumo esichothozwe yinkokheli yeMDC emhlanganweni ewenzele eHarare ngoLwesibili.
Nyakenye ibandla leli lehluleke ukwenza imihlangano yalo eminengi endaweni ezitshiyeneyo zelizwe ngemva kokuvinjwa ngamapholisa.
Isikhulumeli sikaChamisa, uDr. Nkululeko Sibanda uthi ukuvinjwa komhlangano wangoLwesithathu lo kuveza sobala ukuthi uhulumende weZanu PF uyamesaba uChamisa.
Your browser doesn’t support HTML5
Ingxoxo loDr. Nkululeko Sibanda
Sizamile ukuxhumana lesikhulumeli samapholisa uAssistant Commissioner Paul Nyathi ngaloludaba kodwa ucingo lwakhe belungangeni.