Bekulokufuthelana okukhulu lonyaka phakathi kweZanu PF leMDC phezu kwempumela yokhetho lwanyakenye, ibandla leMDC lisala ukunanza uMongameli Emmerson Mnangagwa ngoba lisithi waqilibezela kulolukhetho.
Ngokunjalo, amalunga alelibandla ebengayi edale lephalamende nxa uMnangagwa ekhona. IMDC ithi uMnangagwa uselethele uzulu ubuyanga obumangalisayo ngokwehluleka ukuvuselela umnotho.
Okucunule lelibandla kakhulu yikwalelwa ngamapholisa ukwenza imihlangano yalo endaweni ezitshiyeneyo zelizwe kanye lokutshengisela ezitaladeni.
Amalunga ebandla leZanu PF lawo ebethukuthele phezu kokwala kweMDC ukunanza uMnangagwa njengoMongameli weZimbabwe, okubangele ukuthi acine evimba amakomidi edale lephalamende akhokhelwa yiMDC ukuthi asebenze.
IZanu PF ithi njalo iMDC yiyo eyabangela ukutshabalala komnotho ngokukhankasela izijeziso zenotho. Inengi lithi ukufuthelana lokhu kulakho ukuqhubeka ngomnyaka ozayo.
Ukuhlaziya loludaba sixhume ilunga leZanu PF uMnu Believe Gaule lomgcinisihlalo weMDC uNkosazana Thabitha Khumalo yena othi bahlukuluzwe kakhulu yiZanu PF lonyaka.
Your browser doesn’t support HTML5
Ingxoxo loNkosazana Thabitha Khumalo loMnu Believe Gaule