Inhlanganiso ebona ngokudingela abalambayo ukudla phansi komanyano weUnited Nations, iWorld Food Program (WFP) ithi indlala iqhubeka ihlasela ngamandla eZimbabwe njalo ithi idinga imali engangeUS$293 million yokuthengela abalambayo laba ukudla.
Kodwa ithi okwamanje ileUS$87.9 million kuphela. IWFP ithi izakhweza inani labantu ebabela ukudla ngokuphindwe kabili ngoZibandlela lifike ku4.1 million.
Umqondisi walinhlanganiso uMnu David Beasley wethule umbuko esithi indlala izaqhubeka ihlasele ngamandla langomnyaka ozayo ngoba kukhanya kungasoze kube lezulu elaneleyo njalo lonyaka.
Wengeze wathi ukudula kwezinto ngenxa yokudilika komnotho lakho kwenza impilo ibe lukhuni ngamandla ebantwini abanengi.
La ngamazwi agcizelelwe ngesinye njalo isiphathamandla seWPF esibona ngokuqhutshwa kwenhlelo zalinhlanganiso eMandebeleni uNkosikazi Praxedes Moyo.
“Umumo wendlala uba mubi kakhulu ngenxa yokuthi abantu abazange bavune okwaneleyo ngomnyaka iphelileyo. Phezu kwalokho, abantu abalamali yokuzithengela ukudla ngoba intengo yakho iphezulu,” kutsho uNkosikazi Moyo.
Wengeze wathi bakhangelele ukuqhelisa inhlelo zabo zokwabela uzulu ukudla ngoZibandlele bafinyelele izigaba ezinengi ezigoqela ezenyakatho lezansi yeMandebeleni lapho abangakafiki khona.
Isakhamuzi seKezi uMnu Lethukuthula Dube uthi bakumelele ngabomvu lokhu kudla ngoba okwamanje umangoye uselala eziko.
“Akulalutho lonyaka, akula. Sibhekane le-black market kuphela izinto ziyaduna lapha. Ukwabelwa ukudla sakucina kudala, ngapha kithi akukafiki,” kutsho uDube.
Umeli weBulilima West edale lephalamende uMnu Dingumuzi Phuti ugcizelele amazwe kaDube esithi eyalonyaka indlala imbi okumangalisayo.
“Iqiniso elikhona yikuthi indlala ibhahile ngoba abantu abazange bathole isivuno esihle. Mubi kakhulu umumo,” kutsho uMnu Phuti ekhuluma leStudio 7.
Owaye waba ngumeli weInsiza South kudale elifanayo uMnu Malaki Nkomo yena othi izifuyo seziphelile esigabeni sakhe.
“Okunje angikaze ngikubone selokhe ngaba yini,” kutsho uNkomo. “Abanengi bengakufakaza lokho. Inkomo ziyafa ngoba amadlelo akekho.”
Inani labantu abalambayo njalo abaginga ukudla eZimbabwe lifika phose kuzigidi eziyisitshiyagalombili, 7.7 million. Izigidi ezimbili zisemadolobheni kuthi ezinhlanu zisemaphandleni.
Inani leli lilakho ukukhuphuka kuyiwa phambili nanku phela izulu likhanya lingekho. Njengokutsho komqondisi weWFP, uBeasley, “kusazoba kubi.”
Your browser doesn’t support HTML5
Udaba Siluphiwa nguNtungamili Nkomo