Uhulumende wakweleSouth Africa uthi ukuze umnotho weZimbabwe uvuselelwe, kumele kulungisiswe ezombusazwe kuqala.
Amazwi la ethulwe ngumphathintambo obona ngobudlelwano beleSouth Africa lamanye amazwe, uNkosikazi Naledi Pandor emhlanganweni oqoqwe lugatsha lwakhe eUniversity of South Africa, ePretoria izolo.
UNkosikazi Pandor uthe kulesidingo sokuba abezombusazwe eZimbabwe bakhulumisane ngoba ukudonselana phakathi kwabo kusiba lomthelela omubi kakhulu kwezenotho.
Wengeze wathi ilizwe lakhe lamanye akumanyano weSADC azimisele ukuphathisa eleZimbabwe liphume ebunzimeni elikibo.
Kodwa uthe uzulu weZimbabwe kumele akhulumisane abesesitsho ukuthi amanye amazwe engamphatisa njani.
Lanxa engabethanga amabandla ezombusazwe ngamagama, abanye bathi ukhanya ebekhuthaza ukukhulumisana phakathi kweZanu PF leMDC.
Umhlangano wayizolo lo ubungowokuhlaziya umuwo weZimbabwe njalo wenziwe phansi kwendikimba ethi “Best Path to Prosperous for Zimbabwe.”
Abanye abakhulume kulumhlangano bagoqela owake waba ngumsekeli wenhloko kahulumende weZimbabwe uMnu Arthur Mutambara.
EleSouth Africa yilo elakhokhela inkulumo ezakhokhelela ekubunjweni kukahulumende wenkazatho phakathi kweZanu PF leMDC ngo2009.
Ingcwethi kwezombusazwe uDr. Brilliant Mhlanga utshele iStudio 7 ukuthi yinto enhle ukuthi eleSouth Africa likubeke sobala ukuthi kumele kulungiswe ezombusazwe zeZimbabwe ngoba kuyizo eziphazamisa umnotho.
Your browser doesn’t support HTML5
Ingxoxo loDr. Brilliant Mhlanga