Ngesikhathi kunanzwa usuku lokulondoloza amalungelo amantombazana olwe International Day of the Girl Child amantombazana emaphandleni ekhala ngokuthi ahlangana lendubo ezinengi ezitshiyeneyo empilweni zabo.
Amantombazana emakhaya athi lawo afuna amathuba alingana lawamantombazana asemadolobheni ukuze athuthukise impilo.
Inengi lamantombazana emaphandleni lithi libhekane lendubo ezimbalwa ezibalisa ubandlululo kwezemfundo, ukungafinyeleli ezempilakahle, ukuhlukuluzwa kanye lokusetshenziswa bebancane.
UNkosazana Sandra Ndlovu osakhulayo osuka emangaweni weMatshetsheni uthi intanga yakhe esekhaya ibhekana lobunzima obukhulu.
“Uzathola ukuthi umntwana oyinkazana inengi elisemakhaya abala masanitary pads lapho besiya esikhathini umntwana oyinkazana ubanjwa ngamandla ukufaka ilembu, inewspaper, itissue paper ubulongwe okwehlisa isimo somntwana oyinkazana futhi abantwana abanengi abasemaphandleni abenelisi ukuzithengela amapads ngoba ayadula abenelisi ukuthi benelise ukuthola into engenza ukuthi babe lesimo lapho behamba emphakathini okuzakwenza ukuthi bengakwanisi ukuya esikolo,” kutsho uNdlovu.
UNkosazana Senzeni Maphosa oyiskhulumeli sabatsha kubandla leMDC uthi amalungelo amantombazana lokhu esephulwa ngoba belokhu bebanjwa ngamandla ukuya kwenda bebancane.
Kutsho uMaphosa: “Kuthi umntwana lo ebengulowo oswele ithuba lokuya esikolo usuka endiswe emaxhegwini loba abanye abantu abayabe bethe bambona bamhawukela ngaphandle kwevumo yakhe ngaphandle kokuthanda kwakhe, eyenda esesemncane lokhu kubangela ukuthi empilweni kusuka kube lamathuba amanengi yokuthi imitshado enjalo ayiphili ngokunaphakade iphangisa iyephuke.”
UManyano weUnited Nations uthi izigidi zamantombazana emhlabeni wonke jikelele ziqhubekela phambili zingayi esikolo, zibanjwa ngamandla ukutshada njalo zidlwengulwa kungenani lezinqumo ezethulwa kumhlangano owaqhutshwa eBeijing ngomnyaka 1995 wokuvikela ukuhlukuluzwa kwabomama lamantombazana iBeijing Declaration and Platform for Action.
USuku lwe International Day of the Girl Child lunanzwa minyaka yonke mhla zilitshumi lanye kulinyanga kaMfumfu njalo lonyaka luqhutshwa phansi kwesihloko esithi “GirlForce: Unscripted and unstoppable”.
Kusenjalo uzulu eZansi yemaNdebeleni sesole inyathelo logatsha lwezempilakahle lokuvimbela abantwana abavela kulesisabelo ukuthi bangene ezikolweni zokufundela ukuba ngabongi esibhedlela esikhulu seGwanda kanye lese St Anne’s eBrunapeg.
Osakhulayo uMnu Edgar Ncube uthi inyathelo lokuthatha abafundi abavela empumalanga kungela ngitsho loyedwa ovela kwelemaNdbeleni kulezi zibhedlela kaliqondanga.
“Kumele kube le certain number yabantu abazarecruiter from iprovince yonaleyi ukwenzela ukuthi kube lula lalapho sebeqede ukufunda bapasa bakwanise futhi ukuthi baqhatshwe ezindaweni zabo nxa kungaba lomongikazi esibhedlela esifana leManama evelela endaweni enjenge Harare kunzima ukuthi akhulumisane lomuntu ogulayo kumbe ophathekileyo uyabe ekhuluma isisotho lowomuntu ozomelapha ukhuluma isishona sokunzima ukuthi batholane kahle,” kutsho uNcube.
Kolunye udaba izakhamizi zeGwanda South zikhala ezimathonsi ngemva kokuba eleBotswana lidubule inkomo zakuleli ezedlula ikhulu ngemva kokuba zichaphe umngcele weMlambapheli zaya kweleBotswana.
IBotswana ilomthetho wokudubula inkomo zakuleli nxa zithe zachapha umngcele ukuze ivikele ezayo ukuthola imikhuhlane ebalisa oweFoot and Mouth.
Nyakenye eleZimbabwe lidubule inkomo zakweleBotswana eManama ezazishontshwe khonale ezifika phose amatshumi amabili.
Your browser doesn’t support HTML5
Udaba Silethulelwa nguAlbert Ncube