Amakhansila emaphandleni ezansi yeMaNdebeleni athi kuyadingeka ukuthi uhulumende engeze uncedo lokudla ngoba phose zonke izakhamizi sezihlaselwe yindlala.
Inengi lezakhamizi kulesisabelo libhekane lendlala emangalisayo njalo inkokheli yezigaba ithi okwenza umumo ube mubi kakhulu yikuqonga mahlayana kwentengo yokudla, okugoqela impuphu lomumbu.
Isaka lomumbu eziphaleni zeGrain Marketing Board libiza amadola alikhulu letshumi elilodwa, i$110.00, okuyintengo engeneliswa ngabanengi.
Ngakho, amakhansila akulumango athi uhulumende kumele engeze uncedo lokudla kuzakhamizi ngokuphuthuma.
Amakhansila la ebekhuluma emhlanganweni oqoqwe ngumsakazo weVoice of America-Studio 7 usebenzelana lenhlanganiso yeMedia Centre ngoLwesibili eGwanda.
Ukhansila kaWard 17 eFumukwe, eGwanda South, uMnu. Ephraim Nyathi uthi zinengi izakhamizi ezihlaselwe yindlala ezidinga usizo.
“Uhulumende ulayo imizamo yokuthi ancedise abantu abadubekileyo ngokudla kodwa ayisibo bonke abakutholayo; balutshwana abakutholayo,” kutsho uMnu Nyathi.
Omunye njalo ukhansika, uNkosikazi Lobukhosi Malila, omela uWard 4 eStanmore, eGwanda North, uthi ngaphandle kokusilela kokudla, izakhamizi sezithwele amagabha avuzayo ngenxa yokuswelakala kwamanzi.
“Kulezinye indawo esisuka kizo ezingamadwala, khathesi abantu ngitshiye belayinile amanzi, izikotsho zakhona zilesikhathi lapho eziphuma khona amanzi. Ngibona angani singezelwa amadamu abemanengi singenelisa ukuthi lathi sibe lempompi zamanza kusincedise kakhulu,” kutsho uNkosikazi Malila.
Amazwi kaKhansila Malila lakaKhansila Nyathi agcizelelwe yisakhamuzi uNkosikazi Siphathisiwe Nkala, oweSilikwe, yena othi ngempela umangoye uselala eziko emizini eminengi.
“Indlala ibhahile ngapha eGwanda North, into emangalisayo yikuthi indlala inkulu kangaka lamabele lawa akade siwathenga eGMB akhwelile,” kutsho uMaNkala.
Inhlanganiso yeWorld Food Programme ithi abantu abayizigidi phose eziyisithupha, 5, 7million bazafuna uncedo lokudla elizweni lonke jikelele kusukela manje kuze kuyefika isikhathi sokuvuna ngomnyaka ozayo.
Your browser doesn’t support HTML5
Udaba Siluphiwa nguAlbert Ncube