Izakhamizi zeGwanda zithi uzulu wemaphandleni uncedwa zinhlanganiso ezizimeleyo ngoba o uhulumende kungekhakwenzayo ukuthuthukisa impilo yabo.
Lokhu kuvele emhlanganweni oweTown Hall obuqoqwe ngabomsakazo owe VOA Studio 7 bemanyane labeMedia Centre, eGwanda lamhlanje.
UNkosikazi Julieth Nkiwane owenhlanganiso yabomama eyeWomen Development Association of Zimbabwe iWodaz uthi abaziboni inhlelo eziqhutshwa nguhulumende.
“Nxa kungasabuyanga iNGO ezosincedisa akula olunye uhlelo lukahulumende esilubonayo ngoba nxa sokubuya abanye abantu babuya belande abanye abantu, uhulumende nje ukuthi athi isigaba sami eseNqameni, isigaba sami seMatshetsheni, isigaba sami seBolamba isigaba sami esangaphi asikaluboni sisaludinga,” kutsho uNkiwane.
Amazwi akhe agcizelelwe nguMnu Bekezela Maduma Fuzwayo othi akula uhulumende asekwenzile ukuthuthukisa impilo zabantu bemaphandleni selokhu ilizwe lathatha uzibuse.
“40 years sikuIndependence mina ngisuka eGwanda North, akumelanga ukuthi nga sichapha uMtshabezi onje akumelanga nga sihamba ngendlela esihamba ngazo sisiyakithi sikhuluma ngezikolo ezakhiwa ntolontolo ezibuya uphahla luthathwe ngumoya nxa kungasabuyanga amaNGO ezobambabamba akulalutho olwenzakalayo,” kutsho uFuzwayo.
UNkosikazi Lobukhosi Malila ukhansila kaWard 4 eStanmore uthi laloba zikhona inhlelo eziqhutshwa nguhulumende, zisuka ziphambaniseke ngenxa yokusilela kwemali.
“Sibe sesikhangela ekudleni khonapho,ukudla kukhona emaphandleni kodwa kuyasilela ngoba lubuya lulabanikazi ukuthi lukhangele abadala, izigoga , abadubekileyo kube sekusithi inengi lisala ngaphandle ngoba abantu abathathwayo ngabantu abalutshwane," kutsho uMalila.
Ukhansila kaWard 17 eFumukwe uMnu Ephraim Nyathi owebandla leZanu PF uthi lalabo umnotho welizwe ungamanga kahle kukhona uhulumende akwenzayo ukunakekela impilo zabantu bemaphandleni.
“Loba sisebunzimeni obunjalo siyandosa kunjalo silwisana lakho ukuthi sikwenze njalo labangane bethu esithi ngama partners labo bayasifakela izandla kokunye okuyabe kuncedisa abantu bethu emakhaya," kutsho uNyathi.
UMnu Khulekani Sithole obona ngokuqhutshwa kwenhlelo zekhansili yemaphandleni uthi babhekane lodubo lokusilela kwemali okudala ukuba inhlelo zabo zokunakekela uzulu wemaphandleni zingahambi kahle.
“Imigwaqo esihlanganisa lezinye iziqinti kanye laphakathi kwezigaba kusiya kwesinye uhulumende uphatheke kakhulu ekusixhaseni ekulungiseni imigwaqo ngemva kwezulu elike lana elesiqotho elalidiliza imigwaqo,” kutsho uSithole.
UMsakazo weVoice Of America usebenzelana labeMedia Centre unxusa abantu ukuthi baze emhlanganweni ofanayo eLupane kusasa emini lapho okuzaxoxiswana ngodaba lombhuqazwe weGukurahundi.
Your browser doesn’t support HTML5
Udaba Silethulelwa nguAlbert Ncube