Inengi labaphila ngamaphilisi awezifo ezitsheyeneyo, abasemaphandleni aweGwanda eMatebeleland South, lithi seleqisa ukuwanatha ngoba sebiza intengo ephezulu kakhulu emavinkilini athengisa imithi yamakhemisi. Ezibhedlela zikahulumende kakula lona iphilisi lokwelapha ikhanda okwenza abantu babanjwe ngamandla ukuthi bayethenga ekhemisi.
Intengo yemithi lamaphilisi iqonge okwethusayo kulandela inyathelo likahulumende lokuvimba ukusetshenziswa kwemali yakwamanye amazwe eZimbabwe.
Inengi labaphila ngokunatha amaphilisi aweBP kumbe umkhuhlane wetshukela bakhala ngokuthi impilo yabo isengozini ngoba bengasawanathi ngemfanelo ngenxa yentengo ephezulu.
UNkosikazi Nelly Moyo odabuka eMatshetsheni ngomunye wabathi impilo yabo isisengozini ngoba esenatha amaphilisi eseqisa ngenxa yentengo.
“Nginatha amaphili aweBP lawetshukela , konke kuthiwa yi$128 ngaze ngayenza okokuhafula , sesize sinatha amaphilisi okungekho emthethweni ngenxa yokudula kwayo.Ngithenge amaphilisi awe $50 angekho lehafini yokuthi inyanga iphele.UHulumende sicela angenele asidingele amaphilisi ezibhedlela asifakele amaphilisi esibhedlela ekhemesi kunzima kakhulu,” kutsho uMoyo.
UMaMoyo uthi babhekane njalo lokuqonga kwentengo yempahla ezitolo kulandela ukukhuphuka kwentengo yamafutha ezimota kuyonale iviki osekutshiye umangoye elala eziko.
“Izinto ziqonge kakhulu ezitolo , awubakithi uhulumende kake asizame asilungisele asisadli emakhaya ngenxa yokudula kwezinto kathesi sezikhwele kakhulu kanti bakithi kutheni ukuthi kwehliswe intengo yezinto , iflour i2kg siyi $28 manje kuyathiwani icooking oil $27,” kutsho uMoyo.
UMnu Edgar Ncube isakhamuzi seSimbuka uthi inyathelo likahulumende lokuvimba ukusetshenziswa kwemali yakwamanye amazwe eZimbabwe selidale ukuqonga kwentengo yempahla ezitolo lasemakhemesi.
“Bekuseselula loba bekungalula kangako ngalesiyana sikhathi kusavunyelwa ukuthi sisebenzise imali yakwamanye amazwe ngoba abantu kade bekwanisa ukuthi bayithole engxenye abalabantwana abangaphandle babathumele bebekwanisa ukuthi bathenge ngayo lula kodwa okwakathesi izinto nxa ziqhubeka zikhwela zisoma zinjalo iholo labantu kalikhweli limi ndawonye kodwa izinto ziyaqansa,” kutsho uNcube.
UMongameli Emmerson Mnangagwa ngoMvulo ubike ukuba uhulumende uzimisele ukuthuthukisa ezempilakahle kuleli ngesikhathi enikeza izibhedlela imitshina etshiyeneyo yezempilakahle.
Kusenjalo kolunye udaba izakhamizi zeGwanda ezathola imfundiso yokuqala inhlelo zokulima lokufuya kwabeEdward Ndlovu Memorial Library seziveze ukujabula okukhulu zisithi lezinhlelo sezithuthukise impilo zazo.
UNkosikazi Sibongile Dube odabuka kuWard 15 eSilonga lilunga le Amuhela Goat Project njalo balembuzi ezifika phose amatshumi ayisitshiyangalombili, uthi ziyabasiza kakhulu.
“Thina kuyasincedisa kakhulu ngoba sesikwanisa ukubhadalela abantwana ischool fees , siyaykha lezindlu zamazenge , siyakwanisa ukuthi singathengisa sishare imali sibe sithenga ngayo imaterial mbinjana mbinjana,” kutsho uDube.
UMqondisi weEdward Ndlovu Memorial Library uMnu Jackson Ndlovu uthi bananzelela ukuthi inengi labomama emaphandleni beliswela ulwazi lokuqala inhlelo zokuziphilisa.
“Sananzelela ukuthi ulwazi , information inkalakatha yendaba ukuthi kayikho futhi lathi information yokuthi baphila njani sasingelayo kodwa sithe sesivumelane ukuthi iobjective yethu yeGwanda ngeyani, sakhangela information sayibalula sakhangela information esmabhukwini,information ekumacassattes information yokuthi sihlnagane ngamehlo yiyo esilethe ukuze sibe lama activities adale ukuthi sibe lezingandi okulinywa khona sibelendawo okufuywa khona inkukhu kubelendawo okufuywa khona imbuzi,” kutsho uNdlovu.
UNdlovu uthi bazaqhubekela phambili besiza izakhamizi zemaphandleni ngolwazi olungathuthukisa impilo zabo.
Your browser doesn’t support HTML5
Udaba Silethulelwa nguAlbert Ncube