Izakhamizi zemaphandleni zithi zididekile engqondweni kulandela umthetho osungulwe kuliviki ovimbela ukusetshenziswa kwemali yakwamanye amazwe. Inengi lithi alilathemba lokuthi lelinyathelo lizathuthukisa umnotho welizwe.
Lokhu kuza ngemva kokuba intengo yempahla ezitolo ikhuphuke okumangalisayo ngemva kokwethulwa komthetho lo owe Statutory Instrument 142 owenqabela ukusetshenziswa kwemali yakwamanye amazwe ukuthenga lokuthengisa eZimbabwe.
Inengi lezakhamizi ezixoxe lomsakazo weStudio 7 ziveze ukudana ngenyathelo elithethwe nguhulumende.
UNkosikazi Agnes Dube oweDema koMzimuni uthi inengi labantu lithwele nzima njalo kaboni lelinyathelo liguqula impilo kazulu.
Kutsho uDube: “Inyathelo elithethwe nguhulumende kalincedisi ngalutho , ongelamali lokhu esele enjalo engelamali njalo inyathelo lakhona ngeke lilithuthukise ilizwe, as long as ilizwe lethu lingela mali siyabe silokhu siphakathi kohlupho , how many years silohlupho lwemali akulalutho olwenziwayo akula kungaba ngokwe two days kungaba ngokwe one hour kungaba ngokwesecond but siyabuyela futhi khonapha.”
UNkosikazi Sakhelene Ncube oweSitezi eWenlock uthi kalathemba lokuthi limali izawuguqula umkhonomi welizwe esithi limali izaphela njalo amandla njengemali yohlobo lwama Bearer’s Cheques.
Laphana kwahamba so kwagcina amaBearer’s Cheques esiwa okuzwayo so sesabela ukuthi kuzaphinda kube njenga khonokhuyana futhi okwaBearer’s Cheques ngoba lokhu kunzima sibili , sizabona ngakho singatshonjalo okwakathesi asilathemba lokuthi kuzatshintsha kusise endaweni elungileyo ngoba siphakathi kwendlala asikwazi sididekile emakhanda,” kutsho uNcube.
UMnu Aleck Ndlovu ngesinye njalo isakhamuzi seNqameni yoPhondo, uthi laye uyesabela ukuthi idola laseZimbabwe lizaqhubekela phambili lisiwa ngoba uhulumende engela nhlelo zokwenza imali.
“Izinto zingaphonguba ngezesivukampuzane kuyaphambanisa kakhulu inhlelo zebhizinisi, lingakhohlwa ke hlabezulu ukuthi sike saba sesikhathini sokuba leZim dola kanti okwenza ukuthi asiqaliseni ukusebenzisa imulti currency system kwakuyini sasisemumweni yonalo yokuthi sasile Zim dola elaphelelwa ngamandla okokusebenza mina angiboni ukuthi kuzasebenza,” kutsho uNdlovu.
“Esinye njalo isakhamuzi uNkosikazi Betty Sibanda uthi intengo yempahla ikhuphukile ezitolo njalo kalathemba lokuthi lumthetho uzathuthukisa impilo yakhe,” kutsho uSibanda.
Lapha vele kasikaboni ukuthi kwenzani, impuphu ziqansile , asila cent ukuthi imali yakhona ukuthi sithenge sizayithatha nga , sisakhangele so ukuthi kuyanga silovalo ngoba kuthiwa eyake yakhuthwa luhlamvu lombhobho ihlezi ilokhu iqaphise amandlebe kathesi sesibona ingathi khonokhuyana sokubuya , aszi bakithi.
UNkosikazi Julieth Nkiwane ngumqondisi wenhlanganiso yabomama bemaphandleni eye Women Development Association of Zimbabwe Iwodaz, uthi uzulu kumele anikeze uMphathintambo wezemali uMnu Mthuli Ncube ithuba lokulungisisa umnotho welizwe njalo uveze ukudana ngabezitolo asebekhipha impahla ezitolo.
“Ezitolo abantu sebekhiphile ikakhulu emakhemesi lamashop akade elempahla ezithengiswa ngemali yaphandle kwelizwe , sebehle bakhipha impahla leziyana bazifihla so yikho esikwesabelayo ukuthi ezitolo kuyasala kungela lutho abezitolo sebefihlile siyathemba nje ukuthi uhulumende uzakuba lenyathelo lokuthi lokhu kungenzakali ngoba kungaba kubi emashop kungasala kuthengiswa inkuni,” kutsho uNkiwane.
UMnu. Msizi Gumbo ucubungula ngezomnotho, uthi lelinyathelo liveza uhulumende osephelelwe ngamaqhinga njalo kalisoze liphumelele.
“Kusegcekeni ukuthi lapha sibuyela edubeni esaka saba kilo njalo kuiyadanisa ukuthi abakhokheli bethu abenelisi ukufunda isifundo ababa laso , into seziqalile ukuphela emashelifini ngoba zithengiswa ngemali engathengiyo akulamaprices zakwehla ngoba leli ibond note kumbe iZim dola lijujuka daily,” kutsho uGumbo.
UHulumende weZimbabwe uthi lelinyathelo ngelinye lamaqhinga yokuthuthukisa umnotho wakuleli kungenani lokuthi intengo yempahla ezitolo iya iqonga.
Your browser doesn’t support HTML5
Udaba Silethulelwa nguAlbert Ncube