Izakhamizi zeZansi yemaNdebeleni zihloniphe iqhawe lesizwe uDr Dumiso Dabengwa lapho kunanzwa ezamasiko eNyandeni eGwanda izolo. Inengi lezakhamizi lithi uDabengwa ubeyindoda emadodeni.
Induna yeKezi uFuyane obengumhlonitshwa kulumbuthano ucele uzulu ukuthi athule okwesikhatshana akhumbule iqhawe lesizwe uDr Dumiso Dabengwa obekwe lamhlanje eNtabazinduna.
Lokhu kwenzakale ngemva kokuba abaphathi bohlelo beqhubeke ngomsebenzi bengakhulumanga ngokubhubha kukaDabengwa okungaphathanga kahle Induna uFuyane.
“Ngingakangeni encwadini engiyiphiweyo ukuthi ngiyifunde bengicela ukuthi sikhumbuzane sonke singabantwana baseZimbabwe ukuthi ma sibona ifulegi ingafikanga ekucineni kuchaza ukuthini, ukuthi iqhawe elikhulu lihambile bengicela ukuthi sike sithule okomzuzo owodwa silihloniphesingakaqhubeki ngohlelo - Amen.Nxa sikhuluma ngezamasiko siqala sizisondeze emaqhaweni ayiyo asidalela umbuso esikuwo yikho siqala ngeculo ukuze indlela zivuleke,” kutsho uFuyane.
Induna uFuyane igcizelele ngokuthi basele bemadolonzima ngemfa kaDabengwa wakhuthaza intsha ukuthi izinikele njengomuyi.
“Isizwe sonke khonapha simangele kodwa okumqoka ngobaba uDabengwa yikuzinikela, isifundo esisithola kuye yikuzinikela, ungazinikelelanga ukuthi wena nguwe ozathola kodwa uzinikela ukuthi isizwe sakini sikhululeke njengoba wazinikela yena lamhlanje sithi silozibuse wabamba iqhaza elikhulu size sifike lapho esikhona lamhlanje,” kutsho uFuyane.
UMnu Absolom Ndlovu uSobhuku Bhaka weNswazi phansi kweNduna uMabhena uthi ilizwe leZimbabwe lilahlekelwe kakhulu ngokudlula kukaDabengwa. Uthi uzulu kumele afunde ngempilo kaDabengwa ukuthi akulalutho olwehlulayo lapho uthe wazimisela.
“Ngizwa ngidabuka kakhulu emoyeni wami, isiso seZimbabwe sikulesisibanga ngenxa kababa uDabengwa. Olutsha lufunde okunengi kubaba uDabengwa ukubana empilweni nxa umuntu efuna into ukubana ayiyenze kumele uzinikele njengobaba uDabengwa owazinikelayo ukubana akhulule lelilizwe,” kutsho uMnu. Ndlovu.
UNkosikazi Elvis Moyo uchaze umuyi njengeqhawe esithi abasakhulayo kumele balandele impilo yakhe.
“Abantwana kumele bafunde ukuthi uDumiso Dabengwa beliliqhawe eleZimbabwe , ukuze ilizwe likhululeke uDabengwa ubengomunye wamaqhawe asenza sathola inkululeko eZimbabwe,” kutsho uMoyo.
UNkosikazi Molly Moyo oweNyandeni kuVillage 6 ngomunye walabo abakhala ezimathonsi ngoDabengwa.
“Silahlekelwe ngubabawethu okade besikhasa loJoshua Nkomo besifundisa izinto ukuthi ziyenziwa njani noma kade kulamaqhawe akade esilwa egangeni bona bebesitshela ukuthi bantwana bogogo yenzani so ukuze ilizwe lethu lilunge,” kutsho uMoyo.
UDabengwa utshiye umkakhe uZodwa, abantwana abahlanu labazukulu abahlanu.
Umkhosi wezamasiko uqhutshwe phansi kwesihloko esithi African Royalty: Our Heritage njalo lonyaka uqoqwe yiNduna uMasuku eyeMatshetsheni yena okhuthaze uzulu ukuthi alondoloze amasiko akhe.
Ezinye Induna ebesikulumkhosi zibalisa uMathe weBolamba, uNdiweni weKezi lo Mathema weWenlock.
Your browser doesn’t support HTML5
Udaba Silethulelwa nguAlbert Ncube