Umsekeli kaMongameli weZimbabwe uMnu Constantino Chiwenge ngeSonto uphatheke emkhosini wokukhumbula abantu bakweleRwanda abaphose bafike isigidi ababulawa ngomnyaka ka1994 kumbuqazwe owaqalwa ngabohlobo lwesiHutu bebulala abohlobo lwesiTutsi.
Abadala lawamacala bajeziswa njalo uhulumende walelolizwe waqhuba uhlelo lokukhumisana umlotha kwaba lokuxolelana.
Uhambo lukaChiwenga kweleRwanda lolu luphehle inkulumo phakathi kukazulu othi uhulumende weZimbabwe laye kumele alungisise owakhe umbuqazwe weGukurahindi.
Umbuqazwe weRwanda waphehlwa yikuzondana kwemihlobo njalo waqalwa ngabohlobo lwesiHutu becobodisa abahlobo lwesiTutsi bebethesa icala lokubulala owayenguMongameli ngalesosikhathi ngokuwisa indizamtshina yakhe.
Ekhuluma emkhosini lo, uMongameli weRwanda uMnu Paul Kagame uthe lanxa nje umbuqazwe lo watshiya ilizwe lakhe lidabukile njalo kulokufuthelana okukhulu phakathi kwemihlobo etshiyeneyo, sebaqhuba inhlelo zokuxolelana lokuhlalisana kuhle.
Uhlelo lokukhumbula abafela kumbuqazwe weleRwanda lolu luzaqhubeka okwamalanga alikhulu alandelayo njalo luzananzwa ngamazwe atshiyeneyo omhlaba, okugoqela eleZimbabwe lona elizakuba lomkhosi eHarare kuliviki.
Kodwa umbuzo obuzwa ngabanengi ngothi kanti kungani uhulumende kaMongameli Emmerson Mnangagwa engafuni ukulungisisa owakhe umbuqazwe oweGukurahundi ukuze kube lokuxolelana lokuhlalisana kuhle elizweni njengaseRwanda?
UMqondisi wenhlanganiso yeMasakhaneni Projects Trust uMnu Paul Themba Nyathi, uthi kweleRwanda ukukhumisana umlotha kwaphumelela ngoba isandla somthetho sasebenza.
Your browser doesn’t support HTML5
Udaba Siluphiwa nguBathabile Masuku