Ukusungulwa kwenhlanganiso elwela amalungelo abathengi eyeNational Consumer Rights Association (Nacora) kwamukelwe ngenjabulo ngabanengi ngesikhathi abathengi behlala bekhala ngokukhwela kwentengo yempahla mahlayana.
Inhlanganiso le ithi ijonge ukuvikela abathengi kungakhathalekile ukuthi umuntu uyabe ethengani. Ithi izafundisa njalo abathengi ngamalungelo abo ukuze bengancindezelwa ngabathengisayo.
UMnu Percy Sibanda, ongumthengi, utshele iStudio 7 ukuthi amalungelo abo ahlala encindezelwe zikhathi zonke.
“Njengomthengi amalungelo ethu bayawephula, ekudleni uyathenga ulutho olutshileyo kungadleki, kumbe kuphekwe a day before, bakhudumeze kuphela, sekumele udle kuphela,” kutsho uSibanda ekhonona.
“Even uthenga i-grocery, uzathola ukuthi uchago solubolile ususendlini, awusela mali yokubuyela etown ucina usiba forced ukuthi udle into ebolileyo.”
INicora isungulwe ngokusemthethweni ngeviki edluleyo ngoLwesihlanu koBulawayo.
“Umsebenzi wethu yikuvikela abathengi esithi ngama-consumers kuyo yonke indawo lapha abathenga khona, kungaba ngothenga eBank loba e-supermarket kumbe ngofuna i-passport, kungaba yiloba yini. Sifuna amalungelo abo ahlonitshwe,” kutsho isikhulumeli salinhlanganiso uMnu Effie Dlela Ncube.
Your browser doesn’t support HTML5
Udaba Siluphiwa nguBathabile Masuku