Omama bemaphandleni sebekhuthaze uhulumende ukuthi avule inkamba zamapholisa ezigabeni ukuze kubelula ukuthi babike emapholiseni lapho bethe bahlukuluzwa.
Omama beWenlock phansi kweNduna uMathema bathi bayahlukuluzwa ngabesilisa kodwa kusuka kube nzima ukuthi babikele amapholisa ngoba engekho eduzane labo.
Izakhamizi zeSitezi zihamba amakhilomitha alitshumi lanhlanu ukuze ziyefika emapholiseni aseduzane yona atholakala eMtshabezi.
Lokhu kuvele izolo lapho omama bebuthene nanza ilanga elibaqakathekisayo eleInternational Women’s Day.
UNkosikazi Getrude Mahlangu uthi ngaphandle kokuthi bathole izincwadi ezivela emapholiseni abelatshwa emakilinika.
“Nxa ingekho i-One Stop kutsho ukuthi 15km usuka lapha ungumama kufanele uwalk usiyadinga amapholisa ukuthi ubatshengise ilihlo lakho, kambe lendlela iyakhanya amehlo ebuhlungu etshayiwe?.Please siyacela ukuthi uhulumende ake asicabangele sike sibe le camp kumbe yimobile kumbe yini sicela nje khona eduze lathi kube lengalo yomtetho ukwenzela ukuthi lami nxa ngiyabe ngilimele ngihambe ngiyethola usizo olufunakalayo ngingene la emtholampilo,” kutsho uMahlangu.
Esinye njalo isakhamuzi uNkosikazi Loveness Ngulube uthi imigwaqo ifile okudala ukuthi behluleke ukuyafika ezibhedlela ezikhulu lapho bephathekile.
“Singomama sinje kungafika isikhathi sokuthi ngibelethe , ingxenye ngingabelethi kuhle sekufanele ngihanjiswe eGwanda ukuthi izimota zibuye khonapha kubanzima.Sikhangele emigwaqweni njalo imigwaqo yethu ifile ilamagodi ilani lakho konke, besicela uhulumende asizwele nxa kusehlula ukuthi asifakele ithara asigradele kuke kucace ngoba inkomo vele zilala emigwaqweni okutshengisa ukuthi akulamgwaqo,” kutsho uNgulube.
Ukuswelakala kwamanzi eSitezi ngolunye udubo olubhekane labesifazane , kutsho uNkosikazi Josephine Majaha.
“Amanurse amanzi abawanathayo bayawathenga , ngifika ngizobeletha kufuneka amanzi, kufuneka ngiwatshelwe , kufuneka nginathiswe amaphilisi angisoze ngiwanathe amaphilisi ngoba akulamanzi.Ukuthi kanti uhulumende njengoba yena kuconstitution yakhe uthi yonke umuntu ulelungile lokunatha amanzi ahlanzekileyo kanti thina njengoba sisemareserver asobantu na?, kuhlanzeka abasemadolobheni,” kutsho uMajaha.
Kusenjalo ikhomidi yedale lephalamende eyezempilakahle lokondliwa kuhle kwabantwana isichasise umbiko obususabalele ebulenjini be internet othi iminyaka yabantwana abangamantombazana yokuya emacansini imele iyehliswe ibe litshumi lambili.
Umgcinisihlalo walikhomidi, uNkosikazi Ruth Labode uthi iminyaka kade bekhuluma ngayo ngeyo kuthi abantwana abangamantombazana bavunyelwe ukufinyelela izibhedlela nxa bethe bazithwala beleminyaka elitshumi lambili.
Kodwa inengi emaphandleni beseliphatheke kubi ngaloludaba.
UNkosikazi Agnes Mbangeni isakhamuzi seSitezi uthi ukuvumela amantombazana ukuya emancasini bengafikisa iminyaka elitshumi lambili bekuyabe kuhlola.
“Kambe nxa engazithwala engamzala umntwana ele12 years, ulawaphi amathebe aqinileyo , ulawaphi amathambo aqinileyo siyaxolisa kuhulumende emhlabeni , umhlaba ungafi , umhlaba ungabhubhi ngoba sekuyikuphela kwabantwana.Abantwana bazafela ezibhedlela bebeletha kodwa siyancenga siyaxolisa njendesizwe sethu thina abantu siyesaba siyamangala ukuthi kulomntwana ole 12 years okukhulunywa ngaye ngokukhomba,” kutsho uMbangeni.
Abanye abafana loNkosikazi Thandiwe Sibanda bathi lokhu bekuzadala ukuthi umkhuhlane wengculaza umemetheka kulokuthi utshabalaliswe.
“Kodwa nxa sekukhulunywa ngokuthi umntwana ole 12 years kakhombe ngibona engathi kumemethekisa iHiv/Aids ngoba yenalowo umntwana uzakhomba intanga zakhe ayekhomba amaxhegu athathe i-Hiv ngapha emaxhegwini ayeyifaka ebantwaneni ayisoze by the year 2020 nakula AIDS eyabe sesiyiqedile izabe sinengi kakhulu ukwedlula kathesi,” kutsho uSibanda.
Lumhlangano ungenwe zinhlanganiso zabomama ezibalisa iWomens Coalition of Zimbabwe, iWomen Development Assocition of Zimbabwe kanye labogatsha lwabomama kuhulumende abeWomen Affairs.
Your browser doesn’t support HTML5
Udaba Silethulelwa nguAlbert Ncube