UMongameli Emmerson Mnangagwa ngoLwesithathu uhlangane labanye babakhokheli bamabandla aphikisayo ancintisane labo kukhetho olwedluleyo bekhulumisana ngomhlahlandlela wenkulumo athi kumele zenziwe ukuze kulungisiswe ezombusazwe lezenotho eziqhubeka zisiya nganxele.
Ekhuluma emhlanganweni oqhutshelwe eState House lo, uMnangagwa uthe ukuze kube lengqubelaphambili kulezi nkulumo, amabandla aphikisayo kumele amnanze njengoMongameli weZimbabwe owakhethwa ngabantu.
Uthe njalo amabandla la kumele ahlanganise amakhanda aphume lamacebo okulungisisa okuhluphayo elizweni.
UMnangagwa ukhuthaze njalo amabandla wonke ezombusazwe ukuthi akhankasele ukwesulwa kwezijeziso zenotho ezetheswa uhulumende wakhe ngamazwe afana leMelika leBhilithani.
Your browser doesn’t support HTML5
Amazwi kaMongameli Emmerson Mnangagwa
Uthe njalo uhulumende wakhe uzimisele ukugxilisa umbuso wentando kazulu lokuletha inguquko kwezombusazwe.
Ngokunjalo, uthe kungumlandu wamabandla wonke angene emhlangano lo ukuthi aphume lemibono yokumele kwenziwe.
Your browser doesn’t support HTML5
Amazwi kaMongameli Emmerson Mnangagwa
Abamabandla aphikisayo abaphatheke emhlanganweni lo bagoqela umkhokheli weMDC-T uNkosazana Thokozani Khupe, uMnu Lovemore Madhuku oweNCA, uMnu Nkosana Moyo, uMnu Noah Manyika labanye.
Kodwa umkhokheli weMDC uMnu Nelson Chamisa kayanga emhlanganweni lo ngoba esithi uMnangagwa kayisuye omele akhokhele inkulumo lezi.
Isikhulumeli sikaChamisa, uDr. Nkululeko Sibanda utshele iStudio 7 ukuthi uMnu Chamisa uzaphatheka emhlanganweni ozaletha abezombusazwe ndawonye labenhlanganiso ezizimeyeyo ngoLwesine oqoqwe yinkokheli yesiKhristu.
Your browser doesn’t support HTML5
Ingxoxo loDr. Nkululeko Sibanda
UMongameli Mnangagwa laye ubikwa ezaphatheka emhlanganweni lo.