Asekuzinga eliphezulu amalungiselelo omhlangano omkhulu webandla leZanu PF ozakwenzelwa Esigodini esabelweni seMatabeleland South kusukela ngoLwesine uyephela ngoMgqibelo.
Umhlangano lo uzaqhutshelwa eMzingwane High School phansi kwendikimba ethi ‘Zimbabwe Is Open for Business: Peace, Unity Towards an Upper Middle-Income Economy by 2030.’
Lo ngumhlangano wokuqala lapho uMongameli Emmerson Mnangagwa azabe engumgcinisihlalo kulandela ukususwa kukaMnu Robert Mugabe, esikhundleni libutho nyakenye.
Umsekeli kanobhala wohlangothi lwabatsha kuZanu PF, uMnu Lewis Matutu, utshele iStudio 7 ukuthi umhlangano lo uzabe ukhangelane lokuthuthukisa umnotho welizwe.
“Ngombono wethu, umhlangano lo lithuba lokuthi sicubungule udaba lwenotho yelizwe sikhangelane lokusilela kwezinto elizweni, ukusilela kwamali njalo sibonisane indlela zokuthi senelise isifiso zika Vison 2030. Leli lithuba lokuthi siqakathekise udaba lwenotho okuyinto uzulu afuna ukuyizwa,” kutho uMatutu.
Kodwa omunye osakhulayo, uMnu Abel Siziba, uthi ibandla leli kalisoze lethulele lutho uzulu.
“Vele akula lutho olutsha esizaluzwa lapha, into esiyaziyo yikuthi vele yikuhamba bayetshela uMnangagwa ukuthi aphenduke akhokhele Izanu PF; akula eyinye into ezakhulunywa ngaphandle kwakhonokho,” kutsho uSiziba.
Umhlangano lo wenziwa ngesikhathi kukhanya kulokuxabana phakathi kukaMnangagwa lomsekeli wakhe uRetired General Constantino Chiwenga lobanje ibandla leZanu PF likuphika lokhu.
Your browser doesn’t support HTML5
Udaba Siluphiwa nguGibson Bhebhe