Uhulumende weMelika sexwayise uhulumende weZimbabwe ukuthi esule icala eletheswa isiphathamandla seMDC uMnu Tendai Biti njalo atshiyane lokuhlukulula iziphathamanda zalelibandla.
Linkuthazo yethulwe ngumsekeli kanobhala obona ngobudlelwano beMelika lamazwe aseAfrica uMnu Matthew Harrington ekhuluma emhlanganweni weSenate yeMelika ngoLwesine.
Umhlangano lo ubungowokuhlaziya umumo weZimbabwe phansi kwesihloko esithi, “Zimbabwe After Elections.”
UHarrington uxwayise njalo uhulumende kaMongameli Emmerson Mnangagwa ukuthi elahle imithetho encindezelayo efana lePosa kanye leAippa ukuze atshengise ukuthi ngempela uyawuqakathekisa umbuso okhululekileyo.
AmaSenator eMelika esemhlanganweni wokuhlaziya udaba lweZimbabwe ngoLwesine.
Wengeze wathi kumele kube lokukhulumisana phakathi kweMDC leZanu PF ukuze kulungisiswe konke okuhluphayo elizweni okugoqela ukubhidlika komnotho lokusilela kwamafutha ezimota.
Abanye abakhulume emhlanganweni lo yisiphathamandla senhlanganiso ezimeleyo eyeCenter for Global Development uMnu Todd Moss.
UMnu Moss uthe uhulumende kaMnangagwa uyazifananela lokaMnu Robert Mugabe ngoba eloncindezelo njalo engawahloniphi amalungelo kazulu.
Kodwa lokhu kulandulwe ngusomabhizimusi weZimbabwe, obenxusiwe kulumhlangano uMnu Joe Mutizwa, yena othe sokulotshintsho eZimbabwe.
UMutizwa ucele eleMelika ukuthi lesule izijeziso elazethesa amalunga kahulumende weZanu PF.
Your browser doesn’t support HTML5
Lalela Udaba Lolu Ngokugcweleyo