UMphathintambo wezemali, uMnu. Mthuli Ncube ngoLwesihlanu wethule uluhlu lwendleko zikahulumende, ibudget, edale lephalamende lapho amalunga eMDC adudulwe ngodlakela ngamapholisa, amanye alimala ngemva kokwala ukusukumela uMongameli Emmerson Mnangagwa ngesikhathi engena kulelidale.
Isikhulumeli sedale, uMnu. Jacob Mudenda ubize amapholisa ukuzoxotsha amalunga eMDC esithi awatshengisanga nhlonipho kuMngangwa ngokwala behlezi.
Esethula umbiko wakhe, uNcube uphe ugatsha lwezemfundo imali edlula ingatsha zonke, edlula ibhliliyoni elilodwa waphinda wathembisa ukwehlisa iholo lezisebenzi zikahulumende zaphezulu.
Zimbabwe Parliament Scuffle
UNcube uthe abasakhulayo abedlula amakhulu amathathu abathiwa bahola bengasebenzi, ama ghost workers ngesilungu, bazagunyulwa.
Okunye okumqoka okukhulunywe nguNcube yikuthi izigodlo zabammeli be Zimbabwe emazweni zizakwehliswa.
UNcube uthe kusiyaphela umnyaka amafutha ezimota azakhwezwa intengo ngoba ilizwe leZimbabwe yilo elilentengo yaphansi kakhulu esigabeni sezwekazi le Africa ngalokho kuzamele umthelo wokuthenga lamafutha ukhwezwe.
UNcube uthembise izisebenzi zikahulumende ukuthi zizathola iholo le bonus. Uthe sokuzasatshenziswa imitshina yempawu zeminwe kuzisebenzi zikahulumende ukuze kwazakale ukuthi mpela othola iholo uyazakala njalo uyasebenza.
Abanye bathi umbiko ka Ncube wehluleke ukugcwalisisa izifiso zikazulu ezigoqela udubo lokuqonga kwentengo elizweni, ukuswelakala kwemali yaphandle kanye lokunxusa osomabhizimusi baphandle ukuzosungula amabhizimusi abo elizweni.
UNcube uthe kulabo abathenga izimota phandle kwelizwe sebezabhadala umthelo wokuthenga phandle ngemali yedola leMelika hatshi imali yohlobo lwe bond.
Isakhamuzi se Harare uMnu. Kudzai Hondo ekhuluma le Studio 7 uthe loba umbiko wendleko zikahulumende ubuqhelisa isikhwama sika hulumende awuthembisi ukuvuselela umnotho welizwe.
Kutsho uHondo: “Ibudget le isithsengisa ukuthi uhulumende uqakathekise ukuthola imali, ukuthelisa uzulu, engelani lokuthi uzulu lo amthelisayo uyithola ngaphi imali njalo uyithola njani, singakhangela ibudget le ayilungisisanga kahle inhlelo eziletha intuthuko ekuqhutshweni kwamabhizimisi kanye lokuthi impilo zabantu zithuthuke, ibudget le ibikhangelane lokuthi nje uhulumende athole indlela zokuthi athelise uzulu kuphela”
Abanye abakhulume le Studio 7 abanjengengcwethi kwezomnotho, uMnu. Thabani Mleya oyisakhamuzi seHarare uthe uhulumende ulembali yokwengezelela imali eqondane lengatsha zokuvikela ilizwe kanye lezamapholisa okuyinto engabalulekanga ngesikhathi ilizwe elikiso.
Ingatsha lezi zombili ziphiwe imali edlula ibhiliyoni elilodwa. Ugatsha lokuvikelwa kelizwe labalweli benkululeko lithole izigidi ezingamahulu amahlanu lamatshumi amane lasithupa ($ 546 million) kuthi ugatsha lwamapholisa olwe Home Affairs luthole izigidi ezingamahulu amahlanu letshumi elilodwa lasikhombisa ($ 517 million).
Umnumzana Mleya uthi imali le inengi ikakhulu nxa kukhangelwe ukuthula okuselizweni ngakho ke ibifanele ihanjiswe kungatsha zenotho.
“Mina ukubona kwami kukhona ebengikukhangelele ukuthi akusoze kuntshintshe, ukufaka imali kugatsha lwe defense, kodwa kukhona lakho okutsha njengokufaka imali emapulazini, kodwa ke ukufaka imali kudefense le home affairs, asizange sibekwazi ukuthi kuzathengwa imitshina eminengi eyamasotsha kumbe kuzaqhatshwa amasotsha manengi kodwa ukubona kwami nyaka lomnyaka indaba yebudget khonapho akuntshitshi,” kutsho uMleya.
Kodwa omunye okhulume le Studio 7 uMnu. Mlungisi Dube uthe kungelani lokuthi lolu luhlu luhle kobosomabhizimusi kulababayanga utshayele uhulumende ihlombe ngokuqakathekisa ugatsha lwezemfundo njengoba lolugatsha luthole imali enengi ukwedlula zonke ingatsha zikahulumende.
Kutsho uDube: “Ibudget le elethwe ngumthuli ncube, sinanzelkela ukuthi uhulumende uqhubekela phambili lenhlelo ezitshengisa ukubana uthakazelela osomabhizimusi ukwedlula abayanga. Sinanzelela ukuthi ugatsha lwezemfundo luthole imali ethe xaxa ukwedlula ezinye ingatsha.”
Kunjalo nje, kube lokuxokozela edale lephalamende lapho abammeli bephalamende bebandla le MDC bacine bexotshwa ephalamende ngemva kokuba beyale ukusukumela umongameli welizwe uEmmerson Mnagagwa engena ephalamende.
Zimbabwe Parliament Scuffle
Iskhulumeli sephalamende uMnu. Jacob Mudenda ubize amapholisa ukuthi azoncedisa ukuxotsha amalunga edale njengoba umthetho wephalamende usithi kufanele basukume nxa umongameli engena.
Kubikwa uNkosikazi Thabitha Khumalo lamanye amalunga elimele ngesikhathi behudulwa ngamapholisa.
Your browser doesn’t support HTML5
Udaba Silethulelwa Gibson Bhebhe