Inkokheli yenhlanganiso yeCrisis in Zimbabwe Coalition izolo inhlangane lomgcinisihlalo weSadc, onguMongameli njalo waseNamibia, uMnu Hage Geingob, eWindhoek yambonisa ngesimo seZimbabwe njalo yacela ukuthi umanyano wakhe ungenele kulungisiswe ukudonselana okukhona phakathi kweMDC leZanu PF.
Umgcinisihlalo walinhlanganiso, uMnu Rashid Mahiya uthi batshele uGeingob ukuthi ukutshabalala komnotho welizwe kanye lokufuthelana kwezombusazwe kulakho ukucina kubangela impi kubulawe abantu libutho, lona athi selingenela ngamandla kwezombusazwe.
Ngokunjalo, uMahiya uthi bacele uGeingob ukuthi umanyano weSadc ungenele kudaba lweZimbabwe kube lokukhulumisana phakathi kwamabandla ezombusazwe ikakhulu eleMDC leleZanu.
Uthi inkokheli yamabandla la kumele ikhulumisane kulungisiswe okuhluphayo okugoqela ukukhwela mahlayana kwempahla ezitolo, ukusilela kwamafutha ezimota kanye lemali emabhanga.
Ukufuthelana kwezombusazwe kuqhamuke ngemva kokhetho lapho umkhokheli webandla leMDC uMnu Nelson Chamisa ayale khona ukwamukela impumela yokhetho esithi uMongameli Emmerson Mnangagwa uqilibezele.
UMfundisi Useni Sibanda, okuqula leCrisis in Zimbabwe Coalition elihlangane loGeingob utshele iStudio 7 ukuthi balethemba lokuthi umanyano weSadc uzangenela lulungisiswe ngokuphangisa udaba lweZimbabwe.
Your browser doesn’t support HTML5
Ingxoxo loMnu Useni Sibanda
Kodwa isiphathamandla seZanu PF uMnu Effort Nkomo uthi uSibanda labanye bakhe badlalisa isikhathi besiya kuSadc kulokuthi bakhulumisane loMongameli Mnangagwa.
Your browser doesn’t support HTML5
Ingxoxo loMnu Effort Nkomo