Ozithi ungumprofethi uMnu Walter Magaya utshiye uzulu ekhuza umhlola ngeSonto ngemva kokumemezela ukuthi usethole umuthi wokwelapha igciwane leHIV.
UMnu Magaya, yena okhokhela inkonzo yeProphetic Healing Deliverance uveze lokhu esontweni yakhe.
Uphinde wamemezela njalo emhlanganweni awenze lentathelizindaba.
UMagaya uthe phakathi kweminyaka emihlanu edluleyo, wenelise ukwelapha abantu abanengi ababelegciwane leHIV esebenzelane labangane bakhe abavela kweleIndia.
Uthe njalo umuthi lo uhloliwe kulandelwa indlela zesingisi zokwelapha njalo unxuse uhulumende ukuthi awuhlolisise nxa elensolo.
Esikhathini esedluleyo uMagaya uke wathi ulaphe abantu ababebulawa ngumkhuhlane wemvukuzane.
Kodwa imbiko le isolwe ngabanengi abezempilakahle besithi kayilabufakazi.
Udokotela Mpumelelo Sibanda utshele iStudio 7 ukuthi ngokwazi kwakhe, umuthu wokwelapha umkhuhlane wengculazi awukatholakali emhlabeni jikelele.
Omunye njalo osebenza kwezempilakahle ongathandanga ukuqanjwa ngegama uxwayise abaphila legciwane leHIV ukuthi bangakhohliswa nguMagaya babe sebesekela ukunatha amaphilisi abo.
Your browser doesn’t support HTML5
Ingxoxo loDokotela Mpumelelo Sibanda