Abebandla leMDC labeZanu PF sebamukele ngenjalo ukwesulwa kwesihloko somthetho wePosa ebesisipha amapholisa amandla okuvimba imihlangano yabezombusazwe mahlayana.
Umthethwandaba weConstitutional Court unqume ngoLwesithathu ukuthi uSection 27 walumthetho kumele wesulwe ngoba ulakho ukusetshenziswa ngamapholisa ukwephula amalungelo kazulu.
Kodwa uSection 12, ohambelana loSection 27, usakhona njalo usetshenziswa ngamapholisa esikhathini esinengi ukuvimba imihlangano kazulu leyamabandla aphikisayo.
Ukuhlaziya isinqumo senkantolo lesi sixoxe lelunga leZanu PF uMnu Josepha Tshuma lesiphathamandla seMDC uNkosazana Thabitha Khumalo.
Your browser doesn’t support HTML5
Ingxoxo loNkosazana Thabitha Khumalo loMnu Joseph Tshuma
Kusenjalo inhlanganiso ezizimeleyo ezikhweze loludaba emthethwandaba zithi ziyathokoza ngesinqumo somthethwandaba.
Inhlanganiso lezi zibalisa i-Democratic Assembly for Restoration and Empowerment, National Vendors’ Union of Zimbabwe, National Election Reform Agenda, kanye le Combined Harare Residents Association i-CHRA.
Sixoxe loMnumzana Mfundo Mlilo, umqondisi weCHRA, yena ochasisa okunengi ngokwabafuqa ukuthi bekhweze loludaba emthethwandaba.
Your browser doesn’t support HTML5
Ingxoxo loMnu. Mfundo Mlilo
IStudio 7 ayenelisanga ukukhuluma lamapholisa ngaloludaba. Isikhulumeli samapholisa uMnu. Paul Nyathi uthe uphakathi kwekhefu, njalo ucingo lomunye wakhe uMnu. Blessmore Chishaka belungangeni.