Uhulumende wakweleSouth Africa uthi uzimisele ukuncedisa eleZimbabwe nxa uhulumende engacela ukuncediswa kungxaki zomnotho ilizwe elibhekane lazo.
Isithembiso lesi sethulwe ngumphathintambo wogatsha olubona ngobudlelwano beleSouth Africa lamanye amazwe uNkosikazi Lindiwe Sisulu.
Uthe uhulumende weZimbabwe ukhululekile ukucela uncedo yiloba yini elizweni lakhe.
“Asisoke siye eZimbabwe sifike sisithi nansi isikhwama salokhu lalokhuya lisithathe. Kodwa kweyeme kulokhu iZimbabwe ekufunayo ezimisele ukukwemukela kuvela kithi,” kutsho uSisulu.
“Lilizwe esilithatha njengomngane. Sifisa isimo sezinto sihlaliseke eZimbabwe njalo sifuna inhlelo zokuvuselelwa kwezomnotho esezethuliwe ziphumelele.”
Unobhala jikelele webandla leZimbabwe Communist Party uMnu Ngqabutho Mabhena uthe bemukela ngezandla zombili inyathelo leSouth Africa.
Uthe okwakuqala kumele amabhanga amakhulu amazwe womabili ahlale phansi acebisane besekusithi labaphethe ezokulima labo baphane amacebo.
Your browser doesn’t support HTML5
Udaba Siluphiwa nguBennedict Nhlapho