Kufe umuntu oyedwa abambalwa balimala kakubi kudlakela oluqhamuke ekulwisaneni phakathi kwabotsheketsha abadabuka ezigabeni zangempumalanga kwelizwe labesiNdebeleni emigodini yegolide eyeVova eGwanda.
Impi le, ibikwa isilesikhathi eside iqalile njalo esikhathini esedlulileyo amaNdebele asuka eFilabusi abehlezi ehlukuluza abempumalanga okudale ukuthi labo baqoqane bahlome ngoMvulo bayephindisela.
Abalimeleyo esixoxe labo esibhedlela esikhulu seGwanda bathi bahlaselwe ngoMvulo ekuseni ngabantu abafika amatshumi amahlanu abakade behlome ngamabhemba lamahloka.
Ofileyo udojwe egangeni njalo ubikwa efunyenwe equnywe inyawo zombili.
UMqondisi wesibhedlela seGwanda uDr. Purgie Chimberengwa uveze ukuthi bayamukele isidumbu esisodwa kanye labanye abalimele kakubi.
"Abasesimweni esibi ngabalimele amakhanda bekusetshenziswa amabhemba lamahloka lapho kuliwa.Siyenelisile ukuhlenga phose bonke abakade besengozini yokufa kuthi abanye abathathu bahanjiswe esibhedlela seMpilo kuthi abathathu njalo balalisiwe ewadini abanye belatshwe bahamba emakhaya abo.Oyedwa ufele egangeni njalo sesemotsha," kutsho uChimberengwa.
UMnu Limukani Sibanda osuka eNkankezi eFilabusi ngomunye wabotsheketsha abahlaselweyo walimela kakubi. USibanda ulandisa okubehleleyo.
“Izolo ngo 8 ekuseni siqeda kupheka isitshwala ukuthi sisebenze kwasekuthutsha abantu abanengi kakhulu yisikhathi sebexotshanisana lathi mina bambamba sibanjwe saba yitwo ngemva kwakhonokho mina ngicine khonapho ngizibone vele sengisemoteni sengibuya esibhedlela.Bebengafika o50 something abesishoneni ,bekungani vele kule Shona vs Ndebele kungani abazwanani. Ngilimele sibili bangigamulile konke la lenyawo zonke lezi," kutsho uSibanda.
Omunye wabalimeleyo abalaliswe esibhedlela nguMnu Ngqabutho Ncube olesitolo eVova njalo uthi uhlaselwe ngomunye wabathengisayo. UNcube ulandisa isisusa saloludlakela.
“Laba abeFilabusi bebehlala besiba lokuyisikhathi bona vele besokulesikhathi bengabona umuntu okhuluma isishona bambambe bamkarabhe yikho okudale ukuthi labana labo becine besiyaqubuka ngale bebuya ngapha bezosi attacker sacina lathi singena ku cross fire singazi lutho ngoba besekuyilokhuyana ukuthi yonke umuntu okhuluma isiNdebele sokumele atshaywe.”
UMnu Amon Mathafeni Ncube othenga igolide eThornwood laye ngomunye olaliswe esibhedlela ngemva kokuhlaselwa emzini wakhe ngoMvulo ngabantu okucatshangelwa ukuthi bengaba yingexnye yalabo abaphatheke kudlakela lweVova.
“Inyathelo abangalithatha yikuthi bacontol abantu abasegangeni labana ngoba nxa besegangeni laphana kulama claims ukuthi le yiclaim kabana nxa kungayisikho lokhu ukuthi bahlala kumaclaims kungcono baremove basuke ngoba akusahlaleki unkosikazi ebesithi besabile lokulala endlini balele phakathi kwamasimu bawutshiyile umuzi ungela muntu," kutsho uMathafeni.
Isikhulumeli samapholisa eZansi yemaNdebeleni uChief Inspector Philisani Ndebele uthi basaxwayisisa imbangela yaloludlakela.
Lapho sivakatshele enkambeni yamapholisa bekulabotsheketsha abafika phose abangamakhulu amabili ababotshwe ngoMvulo ntambama eVova bavalelwa esitokisini njalo amapholisa ebephakathi kokudingisisa imbali yabo ngamunye ngamunye.
Imbiko esiyitholileyo iveza ukuthi bangaba bahlanu kuleliqembu asebebotshiwe abazomiswa phambi komthethwandaba bethosiswa icala lokubulala.
Amapholisa eqembu leDelta Troop alwisana lodlakela asuke eFairbridge koBulawayo lawo asethelekile enkambeni yeGwanda ukuzoncedisa ukuqeda loludlakela lwemigodini.
Abalaliswe esibhedlela seGwanda balindwe ngamapholisa njalo imbiko esiyitholileyo iveza ukuba bazathonisiswa icala lokuphatheka kudlakela kungenani lokulimala kwabo.
Udlakela lolu luza kungakapheli amaviki amabili uMnu Baron Dube odume ngezegolide Esigodini ebotshiwe ngemva kokudubula wabulala omunye osakhulayo bebanga indawo yokwemba igolide.
Your browser doesn’t support HTML5
Udaba Silethulelwa nguAlbert Ncube