UMongameli Emmerson Mnangagwa ngoMvulo ukhuthaze abakhokheli bamazwe omhlaba ukuthi balandele umzekeliso kamuyi uMnu Nelson Mandela ngokuba ngabakhokheli abaqotho ukuze kube lokuthula kanye lempucuko emhlabeni jikelele.
UMongameli Mnangagwa wethule amazwi la emhlanganweni weUnited Nations wokuhlonipha uMandela, yena owake waba nguMongameli weleSouth Africa, oweNelson Mandela Peace Summit.
Umhlangano lo ungenwe ngabakhokheli bamazwe atshiyeneyo abalande umhlangano omkhulu, oweUN General Assembly oqala ngoLwesibili.
“Kumele siqiniswe ngamazwi kaMandela awokuthi ungakhangeli kolunye uhlangothi. Ungathinkazi. Nanzelela ukuthi umhlaba ulambele izenzo hatshi amazwi kuphela. Yenza okwenzayo ngesibindi,” kutsho uMnangagwa.
Wengeze wathi kuqakathekile ukuthi abakhokheli bamazwe omhlaba bagcwalise izifiso zikaMandela ezigoqela esokuthi kube lokuthula emhlabeni jikelele.
“Ukuhlonipha uMandela singathathi amanyathelo okulungisisa izikhalazo zakhe yikwehluleka ukunanzelela ukuzimisela ayelakho empilweni yakhe yonke.
“Wake wathi ‘kwesinye isikhathi kuba lesidingo sokuthi abantu baphakame babe bakhulu ngezenzo.’ lathi singaphakama sibe bakhulu namuhla. Singaba bakhulu ngokuba ngabakhokheli bomhlaba abaqotho,” uqhubeke egcizelela uMnangagwa.
Kusenjalo, uMongameli wakweleMelika uMnu Donald Trump uhlangane labakhokheli bamazwe atshiyeneyo ebakhuthaza ukuthi basebenze gadalala ekulwisaneni lokusetshenziswa kwezidakamizwa ezifana leCocaine leOpium.
“Ukulungiswa kweCocaine leOpium sokubhahile. Inani labantu ababulawa yizidakamizwa lezi emhlabeni wonke jikelele likhwele ngesilinganiso sokungamatshumi ayisithupha ekhulwini phakathi kuka2000 lo2015,” kutsho uMnu Trump.
“Yinto engalunganga le. Ukuthengiswa ngudlu kwezidakamizwa lezi kubangela ubugangi, ubuhuquluzi njalo kuzala ubuhlamuki obedlulisa amalawulo (terrorism).
Your browser doesn’t support HTML5
Udaba Siluphiwa nguNtungamili Nkomo