Umqeqetshi weHighlanders uMadinda Ndlovu uthi abafana bakhe kabakavuthwa kuhle loba nje betshaye iqembu leDynamos nge3 ka nya ngeSonto enkundleni yeBarbourfields.
Limpumela ize ngesikhathi abanye abalandeli beHighlanders bekhala ngokuthi uMadinda uyadlisa ngokudlalisa abasakhulayo abasaphumputhayo.
Kodwa uMadinda uthi usalilolonga leliqembu ukuze liqine libe yiBosso yendulo.
“Loluhlelo esiphezu kwalo olokubumba iqembu alungeke luhle lusiphe impumela esiyifunayo kungakapheli umnyaka siluqalile,” kutsho uMadinda.
“Kufana lokuthi umuntu athi esakha indlu ahle aqale ukulala phakathi kwayo, akwenzi. Luhlelo oluqhubekayo njalo siziphe iminyaka emithathu; singakafiki lapho sizake sijabule siphinde sikhale.”
Ngemva komdlalo wangeSonto, iHighlanders ikhuphule inani lemiklomelo yalo yaya kumatshumi amathathu lathobamunwemunye.
Lo bekuyiwo wodwa umdlalo weCastle Lager Premier Soccer League oqhutshwe ngempelaviki ikanti kubekhona njalo umdlalo owodwa wenkezo yeChibuku Super Cup obuphakathi kweqembu leChapungu leleMutare City.
IChapungu inqobe nge5 ka 4 ngemva kokutshywa kwembekwa.
Kusenjalo iqembu labesilisa elimela ilizwe emdlalweni wenguqu libe ngutshiki lobhanqa 1 ka 1 leleCongo Brazzaville ngeSonto emdlalweni wokudinga amaqembu azakuyaphatheka kumncintiswano weAfrica Nations Cup ngomnyaka ozayo.
Limpumela itshiye iqembu leZimbabwe lihlezi phezu kwengalane yemiklomelo eyesibaya sikaGroup G lilemiklomelo emine, okulinani eliphethwe liqembu leDemocratic Republic of Congo lona elibe ngutshiki lobhanqa 1 ka 1 leleLiberia.
Iqembu leZimbabwe lizadibana leleDRC ngenyanga ezayo njalo ekupheleni kwemidlalo yezibaya amaqembu amabili azabe ehlezi endaweni ezimbili eziphezu kwengalane yiwo azakuya kumidlalo yokudinga intshantshu zezwekazi laseAfrica ezaqhutshelwa eCameroon ngomnyaka ozayo.
Your browser doesn’t support HTML5
Udaba Siluphiwa nguJoseph Njanji