Umqeqetshi wekolitshi leJoshua Mqabuko Nkomo Polytechnic uMnu Jastone Mazhale ukhethwe ngoMvulo ukuba nguMayor wedolobho leGwanda.
UMnu Mazhale, olilunga leMDC Alliance unqobe obevele ephethe lesisikhundla uMnu Knowledge Ndlovu ngamavoti amabili. UNdlovu ngowebandla leZanu PF.
Ikhansili yeGwanda ilamakhansila ayisithupha angamalunga eMDC Alliance lamane awebandla leZanu PF.
UMazhale, yena oleminyaka yokuzalwa engamatshumi amane lanhlanu, uvotelwe ngamalunga ebandla lakhe kuphela kwathi uNdlovu laye wavotelwa ngawelakhe.
UMazhale uhle wagcotshwa ukuqala umsebenzi. Umsekeli wakhe nguMnu Ponalo Maphala yena okhethwe engaphikiswanga.
Amakhansila edolobho leGwanda.
Esethula umbiko wakhe ngemva kokugcotshwa, uMazhale uthe ikhansili yakhe izasebenza nzima ithuthukisa idolobho leGwanda njalo uthi izalwisana lohlupho lwenkohlakalo.
“Kuluphawu lokuthi kulokunye abakubonileyo ukuze baze bangikhethe ukuba nguMayor. Kunengi esikukhangeleleyo okungathuthukisa iGwanda,” kutsho uMazhale.
Izakhamizi zalelidolobho lazo zithe zikhangelele ukuthi ikhansili kaMazhale isebenze gadalala ilethe ububelo empilweni kazulu.
“UMazhale yindoda eqotho esibona izasilungisela kumbe isithuthukisele iGwanda yethu, ikakhulu udaba lwamanzi” kutsho isakhamuzi uMnu. Mdududzi Tshuma.
Phakathi kwamakhansila alitshumi eGwanda uyedwa kuphela owesifazana, uNkosazana Nappy Moyo, yena othi uzalwisa ukuze izikhalazo zabomama zikhangelwe.
“Ngizazama ukusebenza nzima ukuze omama abangaphandle babone ukuthi ukungena ekhansilini akula bunzima obukhona noma kungaze kube labobaba abangu9 mina ngingedwa,” kutsho uMaMoyo.
Amanye amakhansila abalisa uMnu Albert Ndlovu, uThulani Moyo uNtuthuko Ndebele, uGilbert Dube, uNjabulo Siziba loMkhululi Tshuma.
Your browser doesn’t support HTML5
Udaba Siluphiwa nguAlbert Ncube