Sokulethemba lokuthi ezinye indaba ezihluphayo phakathi kwabomakhelwane abeZimbabwe leBotswana, ezifana lokudutshulwa kwenkomo ezicapha umngcwele lokunye.
Lokhu sokunike abantu ithemba lokuthi lezi nkinga zilakho ukulungisiswa ngemizamo esikhona yokuqinisa ubudlelwano phakathi kwamazwe womabili.
IZimbabwe leBotswana alobelane isivumelwano sokuqinisa ubudlwelwano, eWindhoek, eNamibia ngoLwesihlanu, lapho iziphathamandla zamazwe womabili ebezingena umhlangano womanyano wamazwe angezansi yezwekaz le Africa oweSADC.
Amazwe womabili athi azathuthukisa ubudlelwano obuzabona omongameli bamazwe womabili, beqala ukuhlala phansi emihlanganweni ezamele yenziwe minyaka yonke phakathi kwabomakhelwane laba bobabili.
Minyaka yonke, iziphathamandla ezisuka kubohulumende bobabili, ziyahlanga ngaphansi kogatsha olubona ngokuthula lezomvikela, iJoint Commission on Peace and Security.
Kodwa kulandela isivumelwano esilotshwe phakathi kwabaphathintambo ababona ngobudlelwano lamanye amazwe, umnunzana Sibusiso Moyo oweZimbabwe kanye lo Nkosikazi Unity Dow weBotswana, omongameli bobali labo sebeza qala ukungena limihlangano phansi kwe Bi-National Commission.
Abanye abeZimbabwe asebehlala kweleBotswana bathi inyathela leli lilakho ukubona ezinye indaba ezihluphayo phakathi kwamazwe womabili, zixazululwa.
Umnunzana Rodwell Moyo uthi isivumelwano esitsha sipha ithemba lokuthi indaba eziyingxaki ezifana lokuhlukuluzwa kwabangena elizweni okungekho emthethweni, zingalungiswa…
"Sibona angani kuzanceda ukulungisa okunengi, okufana lokudutshulwa okwenziwa umuntu esiyacela umholo wakhe, kanye lokudutshulwa kwenkomo zeZimbabwe ezingena eBotswana lokungaphathwa kuhle kwabangena elizweni okungekho emthethweni. Ngibona kuzalungiswa masinya njengoba ohulumende bayabe bekhona kumihlangano," kutsho uMoyo.
Umnunzana Amos Madlela uthi ukuthuthukisa kwalobu budlweno kusuka ku Joint Commission kusiya ku Bi National, kuzanceda ngoba sekuse zingeni eliphezulu lapho omongameli bamazwe womabili, bazabe sebekhulumisana behlezi phansi bekhangelene.
"Kuzaphathisa ngoba kuqakathekile ukuthi omongameli babe khona kulemihlangano bezizwele, bengatshelwa ngaba phathintambo zabo. Kulendaba ezinengi ezihluphayo phakathi kwamazwe womabili okufana lokudutshulwa kwenkomo zeZimbabwe kanye lesiphatho salabo abangena elizweni okungekho emthethweni. Ngakho kuqakathekile ukuthi bazizwele indaba lezi," kutsho uMadlela.
UMnu. Mncedisi Dube yena uthi ukulotshwa kwesivumelwano esitsha kutshengisa ukuthi amazwe womabili azimisele ukulungisa ubudlelwano, bona obasebonakele kakhulu ngaphansi kowayengumongameli, umnunzana Robert Mugabe, losanda kutshiya isikhundla eBotswana, umnunzana Ian Khama Seretse Khama.
"Linyathela eliqondileyo ngoba amazwe womabili angomakhelwane, njalo kunengi abangakwenza, uma sebelungise ubudlelwano, okufana lokuthuthukisa ukuthenga lokuthengiselana phakathi kwamazwe womabili," kutho uDube.
Umongameli Emmerson Mnangagwa kanye lomunye wakhe wakweleBotswana, umongameli Mokgweetsi Masisi, kade besemhlangaweni wamazwe aweSADC owenzelwe kweleNamibia, lapho amazwe womabili athethe ithuba ukulobelana isivumelwano se Bi-National Commission.
UMasisi wethekelele eZimbabwe esenda kugcotshwa njengomongameli omutsha weBotswana ngoMabasa, lapho athembise ukuthi uzasebenzelana lo Mnangagwa ukulungisisa okungabe kungahambi kahle phakathi kwamazwe womabili.