Kuhlelo lweWoza Friday kuliviki sihamba lomculi wakweleSouth Africa uDJ Bongz yena ohlabela umdumo weHouse.
Empilweni umuntu ugqugquzelwa ukuthi aphuphe, njalo ekholelwe kulawo maphupho.
Abatsha abanengi eMzansi Afrika baphupha ukuphuma elokishini kumbe emaphandleni bayeziphandela emadolobheni amakhulu afana leGoli, eThekwini, eCape Town lakwamanye atshiyeneyo.
UDJ Bongz, ogama lakhe lokuzalwa nguBongani Dlamini, walandela elakhe iphupho waqala enguDeejay elokitshini leNdengezi eThekwini Kwa-Zulu Natal.
Wasuka lapho wenyuka lamaphupho akhe waphumelela okwamagama njalo khathesi usedume emhlabeni jikelele ngomgido wakhe awubiza ngeGwara-Gwara.
Ngaphambilini komgido lo, omenze wabizwa Mr. Gwara Gwara, uDJ Bongz ubevele esehlonitshwa kabanzi ngokutshaya isigubhu esijabulisa abalandeli bakhe abathanda ukuzijuxuza.
Your browser doesn’t support HTML5
Udaba Siluphiwa nguNomfundo Mkhize
Ezinye zengoma zakhe ezimlethele udumo zigoqela ethi “Thina Sobabili,” yona eyathengwa yathola isicoco seDouble Platinum kanye lethi “Sobuye Sibonane.”
UDJ Bongz useleminyaka engamatshumi amabili ejabulisa uzulu ngengoma ezitshisa izikhotha njalo ulamadlalade amahlanu.
Udumo lwakhe luya luqhela nanku usemenywa lasemazweni aphetsheya ukuyajabulisa umphakathi.
Omunye umgido adume ngawo yi“Vuma.” Kodwa kawufikanga ezingeni leGwara Gwara, yona esisabalale ngomhlaba wonke. Ngitsho abahlabeleli abafana loRihanna sebefunga ngayo iGwara Gwara.
“Eyi, ngakusasa ngavuka nje abantu kubusy, abantu bengifonela, kuthiwa, hayi bo waze wayenza indaba Bongz, ngithi indaba yani?’ kutsho uBonga ekhuluma leStudio 7 eseWashington DC.
“Kuthiwa hheyi, nanku bengisendela uRihanna ushaya iGwara- Gwara emva kwalokho wonke umuntu useyayenza, even uCiara ngimbone enza ivideo, Childish Gambino naye uyenzile, so baningi nje abayenzayo.”
Belungabutshelezi uhambo lwakhe; ubuye wabhekana lenkinga ezithize empilweni yakhe.
Udlule ebunzimeni bokutshaywa yisifo se-stroke, walahlekelwa yimali enengi wabanjwa ngamandla ukuthengisa inkampani yakhe yomculo eyeMabalabala Entertainment.
Laloba ebhekane lobunzima, uBongz utshengise isibindi sokumelana lezivunguvungu njengokutsho kwenye yama-album akhe ethi “Survival of the Fittest!”
UDJ Bongz uthi kudinga isibindi kunoma ngubani ukutshiya lapho obusujwayele khona, ikakhulukazi uma ungusaziwayo ezweni lakho.
"Uyazi buza ukuthi 'ngabe bazongamukela na? Abamuse ukuzivalela ekopini, ukuzivalela ekopini akusizi, abakhululeke nje bephume baye ngaphandle emazweni angaphandla - iyenzeka lento!," kutsho umhlabeleli.
Ungamlandela uDj Bongz enkundleni zokuxhumana ezibalisa eyeTwitter: @Dj_Bongz leyeInstagram: @Djbongz_gwara_gwara.
Your browser doesn’t support HTML5
Woza Friday Silo Dj Bongz