Ilunga ledale lephalamende kweleMelika uSenator Jeff Flake uthi ukubulawa kabantu abayisithupha libutho ngoLwesithathu kuveza ukuthi uhulumende weZimbabwe ulokhu esebenisa imikhuba yendulo ukuncindezela abantu.
Ekhuluma ngemva kokugqiba uhambo lwakhe lokuyaqapha ukhetho ngoLwesihlanu, uMnu Flake, usole ukusetshenziswa kwamasotsha lamapholisa ukutshaya lokubulala abantu laba.
Uthe isehlakalao esi sibuyisela eleZimbabwe emvuva kusikhathi sombuso kaMnu Robert Mugabe yena awayesaziwa ngombuso wocuku engakagenqulwa libutho ngoLwezi nyakenye.
“Ukusetshenziswa kwamasotsha lamapholisa nalindlela akukhombi ikusasa elitsha kodwa kukhomba emuva,” kutsho uFlake embikweni awethulele intathelizindaba.
Ukhuthaze njalo iZimbabwe Electoral Commission (ZEC) ukuthi iphuthume yethulele uzulu amaphepha wonke alemininingwane yabantu abavotileyo kubonakale ukuthi impumeye eyethulileyo iyahambelana yini ekulawo maphepha.
“Ukuze abantu babe lethemba lempumla yokhetho lolu, iZEC kumele yethule yonke imininingwane yokhetho kubonakale ukuthi ngempela konke kuqondile,” kutsho uSenator Flake.
Wengeze wathi abafuna ukuphikisa impumela yalolukhetho kumele benze lokho emthethwandaba.