Abaprofethi besonto yeZion ngoLwesihlanu bakhiphe umgobho edamu leGaranyemba obikwa ububulala abantu kulelidamu njalo ubangela ukuthi izifuyo ziphunze.
Umsebenzi wokukhipha linyoka uqale ngeSonto lapho abaprofethi ababili uMehluli Moyo loThembani Moyo abaqede amahola amathathu besemanzini bedinga linyoka kodwa ngitsho ukuyithola.
Your browser doesn’t support HTML5
Umphrofethi egwaza umgobho abawukhiphe edamu leGaranyemba ngoLwesihlanu
Baphendukile njalo ngoLwesihlanu bengasandlanga nkotshana beyifuna ngamehlo abomvu bayibamba xhaka inyoka elithanga elamachatha amnyama.
Bayithwele linyoka bayayibulalela kwenye isonto eseduzane lapho abayigwaze khona ngomkhonto ekhanda.
Izakhamizi zeGaranyemba zitshele iStudio 7 ukuthi ibisimide iminyaka zithwele nzima ngalinyoka, yona ezithi ibisibulele abantu abahlanu.
“Kulabantu abafa laba ngendlela engacacanga. Kulonkazana lowana kwazokuba lomfana omunye laye okwawela ingwanel kwathi kuwele ingwane wasezama ukuyithatha wasephelela emanzini,” kutsho usobhuku walindawo uMnu Jefrey Dube.
Amakhulu abantu abuthane edamu leGaranyemba eGwanda ngoLwesihlanu kukhithswa inyoka ebisihluphile
UDube wengeze wathi kulomunye njalo ujaha owathola efele phakathi kwalelidamu emile, okuyinto eyaba yisimanga esikhulu.
Amazwi kaDube agcizelelwe yisakhamusi seGaranyemba uNkosikazi Grace Dube.
“Omunye umfana wangena ebamba inhlanzi wahle wafela phakathi. Banengi,” kutsho uMaDube.
Umprofethi, uMehluli Moyo uthe ibiyingozi kakhulu linyoka ebantwini. UMoyo ulenyanga ezintathu ebhoda emaphandleni eGwanda ethungatha ontikolotshi njalo ebakhipha emizini yabantu.
Asenelisanga ukukhuluma lengcwethi ezingafakaza ukuthi ngempela inyoka le kungaba yiyo ebibangela umonakawo wonke lo.
Amaziyoni esenza imithanithani yawo edamu leGaranyemba lapho akhiphe khona umgobho obubulala abantu lezifuyo
Abanye balokuthandabuza ngoba besithi kulenyoka ezivele zihlala emanzini; ngakho bathi kungenzeka ukuthi le bekuyinyoka nje ebizihlalela kulelidamu.
Likhongozela emsakazweni weStudio 7 ngoMgqibelo kuhlelo lwethu lwezemaphandleni lapho esizalethulela khona loludaba ngokugcweleyo.