Izakhamizi zeNyandeni eGwanda zithi ukusilela kwamakiliniki kulesisigaba kufaka impilakahle yazo engozini enkulu ngoba kumele zihambe amakhilomitha edlula alitshumi ngezikaAdan ukuya esibhedlela esiseduzane.
Abanye bathi bancedwa ngamaphilisi abawathunyezelwa yizihlobo ezisebenza kweleSouth Africa. Abangelabo abaseMzansi bayaqanqabula baye esibhedlela esikhulu seMtshabezi ngenyawo.
Abalutshwana abalemali bagada izimota besiya ekiliniki yeStanmore kumbe esibhedlela seGwanda.
Omunye wezakhamizi zeNyandeni lezi nguGogo Sophie Mlilo, oleminyaka yokuzalwa engamatshumi ayisitshiyagalolunye lesikhombisa, 97 years.
UGogo Sophie Mlilo
UGogo Mlilo utshele iStudio 7 ukuthi uvame ukuncedwa zinjiva ezimphathela amaphilisi nxa zithe zavakatsha ngoba inyawo zakhe zingasavumi ngokuluphala.
“Bayanginika sibili amaphilisi, amanye ngiwaginya ekuseni amanye ntambama. Ukuhamba angisakwanisi kanti emehlweni lapho angisaboni,” kutsho uMaNyandeni.
Omama abazithweleyo ngabanye ababhekane lodubo ikakhulu nxa sokumele bayehlolwa babelethe, okudala ukuthi becine bethwalwa ngezinqola behanjiswa esibhedlela seMtshabezi.
Isigaba lesi besibhekane njalo lokusilela kwamanzi okwesikhathi eside. Kodwa ukhansila wakulindawo uthi solwaphela loludubo ngemva kokuthola uncedo kunhlanganiso ezizimeleyo.
Lanxa uhulumende ehlala ethembisa ukuthuthukisa impilo yezakhamizi zemaphandleni, indawo ezinengi zibhekane lobunzima obumangalisayo obufana nje lobezempilakahle obuhlangana labantu beNyandeni lezinye indubo ezinenginengi.
Sehlulekile ukukhulumisana logatsha lukahulumende olukhangelane lentuthuko kazulu wemaphandleni ngaloludaba.
Your browser doesn’t support HTML5
Udaba Siluphiwa nguAlbert Ncube