Imuli kaMnu Robert Mugabe izabakwazi kungekudala ukuthi isivikelo ekubotshweni esasiphiwe uNkosikazi Grace Mugabe ngemva kokutshaya untombazana wakweleSouth Africa uGabriella Engels nyakenye sasisemthethweni na kumbe hatshi.
Ngemva kwamalanga amabili loludaba luthethwa emthethwandaba wePretoria High Court umahluli uthe uzakwethula isinqumo sakhe ngokuya kwesikhathi.
Amagqwetha kahulumende atshele inkantolo ukuthi uNkosikazi Mugabe waphiwa isivikelo lesi phansi komthetho wamazwe omhlaba oweInternational Customary Law.
Athe lumthetho uyavuma ukuthi umkamongameli wezwe avikeleke njengomkakhe nxa engadala amacala esekuhambeni kwelinye ilizwe.
Kodwa amaqwetha amela umamangala, agoqela aweAfriforum laweDemocratic Alliance, atshele umahluli ukuthi akulamthetho owasetshenziswayo ekuvikeleni uGrace.
Athi uhulumende weSouth Africa wasebenzisa ezombusazwe ngenxa yokuthi wayengafuni ukuphambanisa ubudlelwano bakhe lohulumende kaMugabe.
Umgcinisihlalo webandla leDemocratic Alliance uMnu James Selfe utshele iStudio 7 ukuthi basilindele ngamehlo abomvu isinqumo somthethwandaba.
“Sifuna kube lesibonelo sokuthi eSouth Africa akulamuntu ongaphiwa isivikelo ekubotshweni nxa edale icala kungakhathalekile ukuthi wazana lobani kumbe uyini empilweni,” kutsho uMnu Selfe.
“Sikholwa ukuthi isinqumo sikamphathintambo weSouth Africa sokupha uNkosikazi Mugabe lesi isivikelo sasingekho emthethweni.”
Your browser doesn’t support HTML5
Udaba Siluphiwa nguBennedict Nhlapho